Okwa didilikwa oudu wendabi mOndangwa Etine, omukunhu woundjolowele woinamwenyo Simon Nalushiya ta ti.
Okwa ti oudu owa monika mombwa ashike otau dulu okukwata novanhu.
Omupopiliko welelodoolopa lOndangwa Petrina Shitalangaho-Mutikisha momukanda wa shangwa Omaandaxa okwa ti elelodoolopa noshikondo shoundjolowele woinamwenyo ova tameka oshikonga shomatunino eembwa noumbishi meendelelo mondoolopa omo.
“Endabi omukifi wa nyika oshiponga.
Ngee omadidiliko e ya, omukifi ngaho owa nyika nale oshiponga.
Eenghatu domeendelelo onghee nee oda fimana kwaamenwe eefamili, oinamwenyo yomomaumbo noshiwana,” osho a ti ngaho.
Oshikonga otashi tameke nena, osho a ti ngaho.
Kovakalimo vomoExtensions Four noSix, ovenda otai tameke potundi 09h30 fiyo opo13h00 pOndangwa Tennis Club.
MoExtensions Two noThree ovenda otai ka ningilwa pOshinime Primary School okudja potundi 14h00 fiyo 16h30.
Shitalangaho-Mutikisha okwa ti otapa ka kala yo nongudu yokuvenda tai endaenda momudingonoko.
Ovakalimo meenhele edi da kumwa nomomudingono wado otava indilwa va twale eembwa davo noumbishi di ka vendwe, adishe naado da vendelwe nale.
Ovakalimo natango otava indilwa va lopote oinamwenyo oyo tai feekelelwa endabi novanhu ovo va lika ile vanyaywa keembwa noumbishi meendelelo.
Elolodoolopa noshikondo shomayakulo oundjolowele woinamwenyo aa pula ovakalimo va longife okamhito aka koshikonga shovenda yoinamwenyo ndee tava kala va tonata opo va kelele omukifi ou.
