… eikwato pomutima lyomukithi gwekondo nelaka momafundula
Oohango ihadhi tyapulwa pwaana onyama nonkene omatelekela ogo haga thengwa kukehe gumwe miituthi yoohango.
Omolwetukuko lyomukithi gwekondo nelaka moshilongo, omilandu dha tulwa po otadhi pitike owala iimuna yomakondo mbyoka yi li momidhingoloko moka tamu ningilwa iituthi oyo yi dhipagwe ashike okuhinga ongombe tayi zi kehala nenge koshitopolwa shilwe inashi pitikwa.
Uuyelele mboka owa gandjwa kUuministili wIimuna, Oohi, Omeya nEtendululo lyEvi.
Omupopiliko guuministili mboka, Romeo Muyunda okwa popi kutya aantu otaya vulu okutoma oongombe momagumbo gawoi moka muna oohango nenge iituthi yawo yilwe, shampa owala kutya iimuna mbyoka tayi dhipagwa oyi li nale momudhingoloko nenge pomukunda ngoka.
“Ano okuhinga iimuna wu yi fale komikunda nenge kiitopolwa yilwe inashi pitikwa. Onkene ngele oto dhipaga oshimuna eto shi li le mpoka nena kapuna uupyakadhi washa,” osho a popi ngaaka.
Muyunda okwa popi kutya aantu inaya pitikwa tuu nande okufala iimuna okuza komudhingoloko gumwe okuya komudhingoloko omukwawo nenge okuya kofaalama yilwe opo yi ka tomenwe iituthi mwa kwatelwa oohango moshitopolwa sha||Kharas.
“Oondjindikila onkene dhi li miilonga moshitopolwa sha||Kharas. Kapuna okudhipaga iimuna kwa pitikwa,” osho a popi ngaaka.
Etseyitho ndyoka olya ningwa sho oshikondo shuuhaku wiinamwenyo sha kutha po oondjindikila dhimwe, nonande omainyengo giimuna onkene inaaga pitikwa sha landula etukuko lyomukithi gwekondo nelaka oshiwike sha zi ko.
Ashike mongashingeyi omalelo gamwe gopamuthigululwakalo oga zi mokalungu kutya engambeko lyomalweendo giimuna ndyoka lya tulwa po olya ya moshipala iinyangadhalwa yopamuthigululwakalo poohango ngaashi iigonda.
Iigonda olundji oyi li esimano lyopamuthigululwakalo moka omulumentu ha tegelelwa a kale a gonda omukiintu gwe ongombe pethimbo lyohango.
Omupopiliko gwelelo lyoshitunda shaNgandjera, Shiimi Shangula okwa popi kutya ohango ihayi vulu okukalekwa kutya nee omolwoondjindikila ndhoka dha tulwa po dhomainyengo giimuna.
Okwa popi kutya aakwanezimo otaya vulu okudhipaga iinamwenyo yilwe mbyoka yi li po ngaashi oondjuhwa niingulu, omanga mboka ya pumbwa oongombe otaya vulu okukwathelwa kaashiinda nenge kookuume yopopepi.
“Ngele kapunasha, otamu vulu owala okudhipaga ondjuhwa nenge oshingulu ngele oyo owala yi li po,” osho a popi ngaaka.
Shangula okwa popi kutya ohango otayi vulu wo okupula komeho pwaana onyama ngele kapuna shoka tashi vulu okudhipagwa shi elelwe.
Elenga lyomudhingoloko gwaKamatapati, moshitopolwa shaTjozondjupa, Rumbe Uazukunani, okwa popi kutya iinyangadhalwa yopamuthigululwakalo moohango mbyoka hayi pumbwa omatselo goongombe otayi vulu okutegelela omanga pethimbo ndika pwa tulwa oondjindikila dhomukithi gwekondo nelaka.
Pokati mpoka, elenga enene lyomuthigululwakalo gwaMbandja, Kaleb Hamwele okwa popi kutya oshilongo osha pumbwa okwiiyutha komilandu dha tulilwapo okukandeka etaandelo lyomukithi gwekondo neleka.
“Kashishi oshipu, ashike katuna nkene. Otuna owala okwiiyutha komilandu,” osho a popi ngaaka.
Elenga enene lyomuthigululwakalo gwOukwanyama, George Nelulu, okwa pula kutya omolwashike oondjindikila dhekondo nelaka tadhi dhengele nokiitopolwa yokonooli omanga omukithi ngoka gwa ndhindhilikwa koshitopolwa shokuushimba ano ko||Kharas.
Okwa popi kutya nando ongaaka, omuntu okwa pumbwa okupewa omukandapitikilo okuza kombelewa yuuhaku wiinamwenyo opo ya vule okufala iimuna kiitopolwa yilwe.
Omupopiliko gwelelo lyopamuthigululwakalo gwaNgandjera, Isdor Kanelombe okwa popi kutya oondjindikila ndhoka dha tulwa po odha tula muudhigu aakwanezimo, molwashoka otaya kala ya pumbwa okulanda oongombe odhindji ngele ndhoka ya landa nale kuushimba odha kala inaadhi thikithwa omolwomukithi gwekondo nelaka.
