Omulumentu gwomOshakati otaku hokololwa a yugwa oshimaliwa komulungu gwondjembo pethimbo kwa li i ipyakidhila nokutula oshimaliwa meshina lyoATM, lwopotundi 10h30 mEtitano.
Omupopiliko gwopolisi moshilongo, komufala Kauna Shikwambi okupitila molopota yiimbuluma moshilongo, okwa popi kutya ookalyamupombo okwa li ya ambela nakuninga oshihakanwa, noye mu yaha, ya tete etayela lyoshihauto she, ya tuula ondjato yokombunda noye mu kutha oshimaliwa shooN$56 141koomuma.
Konima yaashoka, aafekelwa oya nukile motuukala ontokele nokuya ontuku.
“Otaku hokololwa kutya lwanima otuukala ndjoka oyi idhenge motuukala onkwawo, nokuza mpoka oye ki idhenga natango moshihauto shilwe shoka sha adhika sha thikama,” osho a popi ngaaka.
Ookalyamupombo otaku hokololwa ya yaha omakende nokuya moshihauto shoka yi idhenge musho omanga sha thikama noya fadhukapo ya thinda komudhingoloko gwaKatana.
“Otaku hokololwa kutya oombudhi ndhoka odha thikama nokunukila moshihauto shilwe shoka sha adhika she ya tegelela,” osho Shikwambi a popi ngaaka.
Opolisi oya popi kutya oshihauto shoka osha adhika popepi nondingosho mOshakati West.
Shikwambi okwa popi kutya oondjembo nombele ndjoka kwa li ya longithwa oya monika, ashike oshimaliwa inashi monika sigo oompaka.
Kapuna ngoka a tulwa miipandeko nomakonakono gopolisi otaga pula komeho.
Pokati mpoka, aalumentu yatatu oya tulwa miipandeko moAranos sho taya tamanekelwa eyako lyiimuna.
Aafekelwa mboka oye li pokati komimvo 25 sigo 27 otaku hokololwa ya yaka oonzi ndatu okuza mofaalama yi li momudhingoloko ngoka, mEtitano lya zi ko.
Shikwambi okwa popi kutya aafekelwa otaku hokololwa ya nukile mofaalama yaBloukrans pwaana epitikilo, sha ningwa lwopotundi 14h30.
Otaku hokololwa kutya aalumentu mboka oya tidha nokukwata mo oonzi ndatu, oye dhi manga komagulu noondhalate noye dhi umbu mo mofaalama.
“Otaku hokololwa kutya sho aafakelwa ya mono mwene teya puyo noshihauto, oya fadhukapo ashike mwene gwofaalama okwe shi pondola oku ya kwata,” osho a popi ngaaka.
Shikwambi okwa popi kutya oonzi ndhoka odha shunwa kumwene nomakonakono gopolisi otaga pula komeho.
