Omulumentu ngoka a kala ta kongwa kopolisi mekwatathano nedhipago lyomutamenaki gwepangelo Justine Shiweda okwa tulwa miipandeko.
Omufekelwa ngoka oye wo gumwe gwomaafekelwa yatano mboka taya tamanekelwa eyugo kwa homatiwa lyoshimaliwa shooN$56 000 shoka sha yugwa omukwashigwana popepi nombaanga yoBank Windhoek mOshakati, sha ningwa Etitano lya zi ko.
Omufekelwa ngoka okwa tulwa miipandeko petameko lyoshiwike shika sho wo taku hokololwa kutya okwa kala ta ningile omatilitho aatoolinkundana osho wo aapolisi mboka taya konakona oshipotha shedhipago lyaShiweda sho a kala teya tumine uutumwalaka uufupi.
Pauyelele wonzonkundaneki yina uuyelele kombinga yomakonakono, omatilitho gamwe okwa li ga ningilwa aakonakoni moshipotha okuza konomola yongodhi yaSouth Afrika.
Omufekelwa ngoka okwa tulwa miipandeko mOmaandaha omanga a adhika e li megumbo lyaandjawo yohondakadhona ye mEkuku mondolopa yaShakati.
Otaku hokololwa kutya okwa li ta ningi omalongekidho gokufadhukapo a ye kOmbaye pethimbo a tulwa miipandeko kopolisi uunambo, nokwa tegelelwa a ka holoke mompangu.
Omufekelwa ngoka a kala ta holama ethimbo nuule otaku hokololwa oye kwa li a tuminwa oshimaliwa shooN$4 950 okuza kuPetrus Shikwaya, noshimaliwa shoka otaku hokololwa kwa li e shi pewa konima owala yominute 10 sho Shiweda a ponokelwa mOndangwa, muKotoba omumvo gwa zi ko. Pethimbo lyiihokolola yoboloha, Shikwaya okwa lombwele ompangu kutya oshimaliwa shoka okwe shi tumine omufekelwa, palombwelo lya zi kuhekulu, Abner Mateus.
Mateus, ota fekelwa kepangelo kutya oye omudhaninkandangala medhipago lyaShiweda sho u unganeke eponokelo ndyoka eshi ningi e li mondholongo.
Poshiponokela shoka otaku hokololwa Shiweda(32) a yahwa lwiikando iheyali nokwa tilwa uuzigo.
Okwa mana oondjenda numvo muFebuluali. Aafekelwa yalwe moshipotha shoka shaShiweda omwa kwatelwa Mateus, Shikwaya, omundohotola Fillemon Nakanduungile, Lukas Nekwiyu, Petrus Uusiku, Ngilifavali Johannes osho wo Matatias Ndengu.
