Omukalimo gwomoshitopolwa shaHardap okwa zimine mOmpangu yoPombanda yaVenduka kutya oye a dhipaga ohondakadhona ye omimvo mbali dha piti, sho e mu pondo noonyala.
Omufekelwa Johannes Bock (21) okwa zimine ondjo moshipotha a taalela shedhipago kohi yOveta yOmahepeko gomOmagumbo, sho a holoka komeho gomupanguli Claudia Claasen mEtiyali.
Bock okwa zimine kutya oye a dhipaga ohondakadhona ye, Sara Jonker (17) sha ningilwa momudhingoloko gwaGochas moshitopolwa shaHardap ongulohi yomasiku 12 okuya momasiku 13 gaJuni 2023.
Okupitila momukanda gweyamukulo kombinga yomatamaneko a taalela, Bock mompangu okwa popi kutya ye opamwe naJonker okwa li taya tamanana pethimbo ya li pegumbo lyahe(yaBock).
Omanga ye li mokati koontamanana Jonker okwa kwata Bock miikutu nokwa tindi oku mu etha, osho Bock a popi ngaaka.
Okwa gwedhapo kutya shoka okwa li she mu geyeke nonkene okwe mu kwata mothingo noonyala.
“Okwa li nda hala ndi mu ehameke,” osho Bock a popi ngaaka.
“Konima yokathimbo onde mu etha. Sho nde mu etha, okwa gwile pevi nokwa kambuka.”
Bock okwa tsikile nokupopya kutya okwa pupu Jonker mothingo a tale ngele otiinyenge, ashike kali we tiinyenge.
“Nonande kandali nelalakano lyokudhipaga Sara Jonker paukililo, otandi zimine kutya onda mona kutya ompito opo ya li a hulithe koshimpwininika molwashoka okwa li nde mu ponda noonkondo,” osho Bock a popi ngaaka.
Otandi zimine nondina eitaalo kutya oku mu ponda pamukalo nda ningi sho kwa li nde mu kwata osho she etitha eso lye.”
Bock okwa popi wo kutya kali nande ti ipopile nenge ti ikutha kohi sho a pondo Jonker.
Okwa popi kutya ye naJonker oya kala mekwatathano lyopaihole lya “esiku nawa esiku nayi” pethimbo oshinigwanima shoka sha ningwa, osho Bock a popi ngaaka.
Jonker okwa li a dhipagwa kuna owala iiwike yi li lwopwiiyali a gwanithe omimvo 18.
Omupanguli Claasen okwa mono Bock ondjo shi ikwatelela kehokololo ndyoka a gandja mompangu.
Bock okwa adhika a mangululwa mo mondholongo koboloha omanga inaa gandja ehokololo lye mompangu.
Oboloha ndjoka a li a pewa oya hulithwapo sho a zimine kutya okuna ondjo moshipotha a taalela. Ota galulike mompangu kiihokolola yopetameko lyokupewa egeelo momasiku 13 Juli.
Epangelo okwa li lya kalelwapo kuSakaria Kuutondokwa ongomutamaneki.
Hahende Linus Samaria oye kwa li a kalelapo Bock.
