Eebashu di li lwopo112 kOnawa Extension 7 kOshakati oda teelela okuteyaulwa po konima elelodoolopa vati la yandja omafiku o14 komaumbo a kale a yela po ponhele yamuni.
Ovakalimo ovo va kumwa koshinima eshi, ovo vamwe tava ti ponhele opo ova ninga po ashike eemwedi nhee, otave lilongekida okuyandja omukanda kelelodoolopa laShakati, tava pula vaha kufwe po.
Ovakalimo otava tengenekwa ve li lwopo300.
Momukanda, ovakalimo otava pula elelodoolopa li tale komikundu davo dopanghalafano nopamaxupilo manga inali ya komesho nokuvataataya.
Ova ti ngee ova kufwa po ponhele opo otashi dulika eefamili dimwe di kale dihe na omalukalwa.
Eefamili vati oda pewa fiyo omomafiku o28 Septemba di kale da fiya po onhele oyo.
“Inatu tunga eebashu edi shaashi ngeno twa hala okudina oveta ile elelodoolopa lOshakati.
Otwe shi ninga shaashi otwa hepa, katu na oilonga fyee itatu dulu okufuta ohiila,” ovakalimo tava ti momukanda.
Ova ti vamwe vomuvo otava xupu moilonga yopakafimbo noiyemo oyo hava mono luhapu ihai lande oikulya nokuyambidida ounona vavo novakwapata.
Ovakalimo ova ti ove li pedu lamuni shaashi ova hala onhele yokudja nokwaamena eefamili davo.
“Kovanhu ovo vehe na oilonga tai kalelele, okumona omalukalwa ombilixa okwa ninga ondilo.
Ngee eefamili itadi dulu okufuta ohiila, ohadi fininikwa di tale kutya otadi ningi ngahelipi opo di tule ounona vado meameno noku va kongela omalukalwa,” omukanda tau ti.
Ongudu yovakalimo ava otai pula elelodoolopa li talulule oshinima eshi ndee tava kundafana kutya oshike tashi dulu okuningwa po.
Ova ti kutya oluhepo nokuhena oilonga nomumbwe yeemhito dokumona omaumbo e na ombilixa oimwe oyo tai etifa oinima yoludi eli.
Ovakalimo natango ova pula kutya oshike eebashu davo odo ashike di na okuteyaulwa po da ninga ashike eemwedi omanga pu na odo da kala po omido dihapu.
“Oshike naana sha etifa etokolo eli lokukufa po eebashu detu konima ashike yeemwedi nhee? Ngee dikwao oda kala po oule womido, oshi li ngaa mondjila nopauyuki okukufa po eebashu detu moule womafiku o14 inatu pewa opo hatu ka kala?” osho va pula ngaho.
Ovakalimo natango ova hala elelodoolopa li yeleke kutya otava i peni ngee ova kufwa po ponhele opo.
Ova ti inava lombwelwa kutya otava yuka peni nove na oumbada kutya oshinima eshi otashi ka fiya eefamili dihe na omaumbo.
Omupopiliko welelodoolopa lOshakati Martin Kapuka okwa ti elelodoolopa ola yandja elombwelo kovanhu ve li lwopo112 kOnawa Extension 7 va fiye po onhele oyo ve likufila.
Okwa ti ova ya po shihe li paveta nokakwa li va pewa ediminino kelelo.
