Omunapaliamente wongudu yoAffirmative Repositioning (AR) Ester Haikola-Sakaria ota pula epangelo li yandje ouyelele woidjemo yomakonakono etulopedu moilonga lakomufalandjai wopolifi Joseph Shikongo sha landula omunhu oo a hangika mEumbo lEpangelo ehe shiivike apa a pita.
Shikongo okwa li a tulwa pedu kupresidente Netumbo Nandi-Ndaitwah momafiku 05 Mei, ndele komulafandjai Anne-Marie Nainda ta i ponhele yaye ta vatele oule wodula.
Konima yeemwedi nhano, Haikola-Sakaria okwa hala minista mOmbelewa yaPresidente Charles Mubita a fatulule kutya oidjemo yomakonakono otai ka yandjwa koshiwana naini nomolwashike omatomeno etulopedu moilonga laShikongo inaa popiwa mo.
Ota pula yo vali ngee ekalelepo loinima okwa li ngaa la kala nokulongifwa, ta pula kutya omolwashike Nainda naye ina tulwa pedu sha landula ovanadolongo vahamano ovo ve li vaka modolongo kOnandjaba muMei.
Haikola-Sakaria natango okwa hala Mubita a fatulule kutya omolwashike Shikongo a tulwa pedu omanga omukulunhu wEtanga lEameno ina ningwa sha, pakutala kutya kEumbo lEpangelo oku na ovakwaita.
“Minista na yandje ouyelele ngee omafano kEumbo lEpangelo okwa li taa longo pefimbo oshiningwanima eshi sha ningwa naau kwa li e na oshinakuwanifa shokwaapangela nokwaawilika,” osho a ti ngaho.
Mubita okwa li a teelelika a yandje enyamukulo onghela.
