Eshi Laina Kangayi (23) a mona oilonga momudo 2024, okwa li e shii ota dulu okukala te liyambidida nokuwanifa po eemumbwe daye monghalamwenyo.
Kalele, natango ota xupu shokadila, nande oku na oilonga.
Kangayi oha longo peshina mofitola i li mOvenduka omo ha kwata oshimaliwa shi fike poN$1 900 ile oN$2 500 komwedi, she likolelela koiyemo yofitola.
Oha longifa oshimaliwa shi fike poN$700 moikulya, oN$500 mohiila, oN$500 molefa, oN$250 meemumbwe dofikola yokaana kaye noN$300 moipumbiwa ikwao yomeumbo.
Oha lande yo omboloto yokaana kaye keshe efiku i na oN$15.
“Inashi wana, shaashi nameme ihandi mu tumine sha. Inandi hafa,” osho a ti ngaho.
Kangayi ota indile Oministeli yOuyuki nOipamabele yOilonga i talulule eendodo ndeendjabi, ta ti ovanailonga ovo ve na eendjabi di li pedu moshilongo otava mono oixuna.
Kandje Boniface (26), womOvenduka, okwa ti ondjabi yaye efimbo limwe ohai ningi po ashike omafiku avali, osho hashi mu fiye moudjuu wokuwanifa po eemumbwe daye omwedi aushe.
“Omafimbo amwe ohatu fininikwa tu lye eengunga ile tu kale tuhe na oshimaliwa. Ondi na eemumbwe itandi di wanifa,” osho a ti ngaho.
Boniface ina popya ondjabi yaye, ashike okwa ti oha mono oshimaliwa shi li pokati koN$1 000 noN$4 000 komwedi.
Okwa ti ondado yoikulya ya londa, ohiila nolusheno oye shi ninga nee vali shidjuu nokuli ovanailonga ovo hava mono oimaliwa ishona va dule okuwanifa po oipumbiwa yavo.
Rebecca Mulyata okwa ti oha mono oshimaliwa shi fike poN$1 500 komwedi mofitola.
Naye oku na eembumbwe ngaashi naana davakwao.
“Onda konga ohiila i na ombilixa. Ohandi futu ohiila yoN$250,” osho a ti ngaho.
Etata lOvanamibia ovo hava longo ohali mono ashike oshimaliwa shi fike poN$5 000 ile nokuli shishona komwedi, she likolelela kouyelele wehangano lomavalulo opashiwana laNamibia.
Omupopiliko woministeli yOipambele yOilonga Maria Hedimbi Oshoondaxa okwa itavela kutya Ovanamibia vahapu ihava mono eendjabi tadi dulu okukandula po eemumbwe davo.
