Omunapaliamente wongudu yoIndependent Patriots for Change (IPC) Ferdinand Hengombe kwa hala okuuda ngee minista woikwafaabulika, eemina noikwanghono Modestus Amutse ota kalele po ngaa oimaliwa oyo tai kana sha etwa ketokolo laye lokuningulula etokolo lehangano ledina Namibian Competition Commission tali anye omahangano avali eeshamende, Cheetah Cement nOhorongo Cement a ye mumwe.
Eshi Hengombe okwe shi pula mOmutumba wOpashiwana Etitatu, sha landula etokolo lOmhangu yOpombada olo la mona kutya etokolo lAmutse kali li paveta loo inali pumbiwa.
Okomisi oyo hai wiliki ekufombinga lopauyuki meengeshefa moshilongo okwa li ya anya etulomumwe lomahangano aa konima ya mona kutya otashi dulika li piyaaneke oshikondo shaNamibia sheeshamende.
Hengombe okwa pula kutya oshike minista e na okuningulula etokolo la ningwa kolutu lomondjila la totwa okulonga oilonga oyo.
“Omolwashike hatu toto omahangano haa longifa oimaliwa yovafuti voishoshela a longe oilonga yonhumba oyo inatu fimaneka?” osho a pula ngaho.
Okwa pula ngee Amutse ota kalele po oimaliwa oyo ya kanifwa kepangelo inashi pumbiwa molwetokolo laye olo.
Hengombe okwa ti etokolo laminista ola lyatela pedu eenghono dokomisi ndee ta popi kutya okwa limbililwa kombinga yekalelepo loinima eshi etokolo loministeli la ka monika kutya kali li paveta.
Okwa ti minista na fatulule ngee oimaliwa aishe ya longifwa kepangelo kutya nee omoohaende ile mukeshe ngaa osho sha pamba etokolo laye ote i kalele po.
