Oshiputudilo shoNamibia University of Science and Technology (Nust) osha ti otashi yandje ehoololo kovalihongi vounongononi woikwamiti molabolatoli va lundulukile keepolohalama dimwe ile va tuminwe koiputundilo ikwao oyo i na opolohalama yafaafana naai manga tashi longo mo oikumungu aishe ya kundukinda etambuleko lopolohalama ei.
Mouyelele wa yandjwa Etitatu, oshiputudilo osha ti otashi kundafana neelabolatoli dopaumwene opo shi kongele ovalihongi eemhito dokulideula.
Ouyelele owa landula omukanda womomafiku o30 Septemba tau popi kutya kapu na eenhele da wana dokuningila omadeulo.
Oshiputudilo osha ti osha popya novalihongi opo va dule okupopya nghee onghalo ye va kuma, va kundafane osho va hala sha ningwa po kombinga yelihongo lavo nokutofa mo omayambidido oo keshe omulihongi a pumbwa.
Nust okwa ti okwa popya nEhangano lOkukonakona Omifika dEhongo moshilongo opo li yandje ouyelele woiputudilo ya shangifwa tai dulu okuyandja opolohalama ei.
Ina tumbula nande kutya oiputudilo ei oilipipo komadina ile omwaalu wovalihongi ovo va kumwa koshinima eshi.
Natango oshiputudilo osha ti omalongekido kombinga yoshimaliwa otaa ka longwa mo sha yooloka novalihongi otava ka shiivifilwa ngee eenghundafana da pu.
“Ovalihongi ova kumwa koshikumungu eshi sha yooloka,” oshiputudilo tashi ti.
Osha ti omayambidido exungomwenyo aa yandjwa a vatele ovalihongi ve lididimikile onghalo, nakeshe omulihongi ota ka mona omukanda u na ouyelele kombinga yaye ngee eenghundafana da manifwa.
Oshiputudilo osha ti otashi twikile nokuyandja keshe ouyelele upe kOministeli yEhongo.
Kakele kwaasho, oshiputudilo natango osha ti oshi na oshinakuwanifa shokupotokonona oshikumungu eshi notashi ka shiivifila ovalihongi ngee omalongekido apu.
