Presidente wongudu yoPopular Democratic Movement (PDM) McHenry Venaani okwa indila epangelo li yambidide ovanafaalama ovo va kumwe komukifi wekondo nelaka.
Venaani edi okwe di popya mOmutumba wOpashiwana Etitatu, ta pula omuprima minista Elijah Ngurare kutya epangelo ola dilaaladila po shike kombinga yokuyambidida ovanafaalama ovo va taalela omukundu woshimaliwa molwomukifi ou.
“Omeva aa patwa, novanafaalama otava pulwa va fute oishoshela yoNamibia Revenue Agency (Namra). Epangelo otali ka tala kokuyandja okamaliwa kopaulumomumbwe?” Venaani ta pula.
Okwa ti ovanafaalama ovo va kumwa konghalo ei ova taalela omikundu doshimaliwa ndele ta pula epangelo li ninge po sha.
Venaani okwa popopya yo vali oshikumungu shehangano ledina Beefcor olo tali dilaadila li kufe ovanhu ve li lwopo393 moilonga, ta londwele kutya oupyakadi wekondo nelaka otau dulu okukala u na oilanduli ya mana mo moshikondo shombelela nokovanailonga ovo ve likolelela moshikondo eshi.
Okwa pula ngee epangelo otali dilaadila okuyambidida eengeshefa odo da kumwa novanafaalama noshimaliwa va dule okuwanifa po eemumbwe davo dopashimaliwa.
“Epangelo otali ka tala oshinima eshi, shaashi oove omutwe wepangelo? Omeva aa patwa novanafaalama otava pulwa va fute Namra,” osho a ti ngaho.
Veenaani natango okwa pula Namra a xulife po okufininika ovanafaalama neengeshefa, omanga ta indile Beefcor nomahangano akwao aha kufe ovanhu moilonga meendelo manga onghalo tai kala xwepo.
Venaani okwa ti epangelo nali kendabale li kufe omilandu odo tadi yambidida ovanafaalama neengeshefa di dule okuxupa nokwaamena oilonga.
Oudu wekondo nelaka owa tula ovanafaalama moupyakadi, nomangabeko okweendifa oimuna nokulandifa eengobe otaa i moshipala oilonga nokumona oiyemo, osho a weda po ngaho.
Venaani okwa ti epangelo inali tala ashike kokuwilika omukifi ashike nali tale yo kokuyambidida ovanafaalama, eengeshefa novanailonga vaha mone oixuna molwomukifi ou.
