Okaana kokamati (15) ke li mondodo onhihamano oka tulwa konima yekumba notaka tamanekelwa oshipofa shedipayo nomunyeka sha landula efyo lomukainhu (60) kOnheleiwa moshitopolwahoololo shaMusati.
Nakuningwa oshihakanwa vati okwa ponokelwa meumbo laye Etitano la dja ko.
She likolelela kolopota yopolifi, okamati vati oka ya meumbo lomukulupe ndee take mu denge kekofi noshinima shihe shiivike.
Opolifi oya ti okamati vati okakufa po ongodi yopeke yomukainhu ou nokakalata konima yeponokelo.
“Omutamanekwa okwa ya meumbo lanakuningwa oshihakanwa ndee te mu denge noshinima shihe shiivike kekofi, osho she mu ehameka neenghono ndee ta kufa mo omaliko aye (ongodi yopeke nokakalata),” olopota yopolifi tai ti.
Komufala wopolifi koshitopolwahoololo shaMusati Ismael Basson Etitatu okwa koleka kutya okamati oka mangwa po noka holoka mOmhangu yaMangestrata mOutapi Etivali, omo kwa li ka taalela oshipofa shedipayo noshomunyeka.
Vati oha di poushiinda notaku tiwa ova pambafana nomukulupe.
Omutamanekwa oku li mondodo onhihamano kofikola i li pomudingonoko.
Omukulunhufikola Etitatu okwa koleka kutya omutamanekwa oha i kofikola yaye.
“Eeno, oha fikola pofikola yange e li mondodo onhihamano,” omukulunhufikola ta ti.
Omukulunhu wehongo kOmusati Paulus Kashiimbi, nande ongaho, okwa ti: “Ombelewa yange inai shiivifilwa kombinga yoshikumungu eshi.”
Basson okwa ti oshipofa eshi otashi ka udika momafiku 29 Oktomba.
