Moutalala nomhepo yamhatutu oufiku womafiku 16 Juni, ounona ve li lwopo10 va dja koAngola okwa li va kondeka omundilo mOkuryangava mOvenduka, va teelela okulya ouvalelo.
Efiku okwa li lile.
Ova kala momapandaanda tava ehele okudja pohamano yongula.
The Namibian okwa ninga omafiku atano nounona ava opo a ude apa va dja naasho hashi va alulile kOvenduka.
Otwa popya nounona novakulunhu ve li vatano.
Ovanambia ohave va ifana “pe nge ondola’.
Ounona ava ohava ende oinano ileile ve li meebesa nomeeloli, vamwe ohava kala tava ehela momapandaanda omanga vamwe tava landifa omaluko.
Ova kala nokufaduka po oluhepo moAngola okudja momudo 2023.
Momafiku 16 Juni, omushingi wohauto okwa idila ekende laye pomashakeneno eendjila ndee ta tale kombinga ikwao opo aha shakeneke omesho nokaana aka kamwe.
Okaana okwa li taka indile odola.
“Epangelo letu otali kufa ounona ava momapandaanda naini?” omushingi ta pula omutwaalelwa.
Ounona ava Ovamuila va dja koumbuwanhu waAngola.
Ova ninga po omatala okulandifila kOkuryangava eumbo lavo.
Pexulilo lefiku keshe, ohava ongala va lye ouvalele voo tava kundafana nghee efiku lavo la enda.
Konguloshi, omukainhu umwe okwe va pula melaka lavo kutya olyelye a ninga oimaliwa ihapu.
“Ou a mona oimaliwa ihapu oye ta pewa oikulya ihapu,” ta ningi omashendjo.
“Oikulya ka ihapu, ashike oshi dulife,” osho a ti ngaho.
Konima yokulya, ohava ningi omafaneko efiku la landula, manga inava kufa oipakete yavo opo hava nangala.
Opu na omafiku amwe hava nangale ondjala.
EFIMBO OLA PWA KO
Ounona ava vokoAngola ova ninga omukundu wakula kepangelo laNamibia naAngola. Ovatalelipo ova ti kutya “oshilengifa” okutala ounona ve li monghalo i li ngaha.
MuMei 2026 Elelo lOshilando okwa li la kendabala li wilike ounona ava pomashakeneno eendjila nopeenhele domalandifilo moshilando ashishe.
Ova mona kutya ounona ova pya komutenya neenghono navamwe okwa li ve na omanyutu.
Ova mona yo vali kutya oimaliwa ounona ohave i kufwa konima ashike yokafimbo eshi ve i pewa.
“Oshinima eshi otashi monifa ounona oixuna,” olopota osho ya ti ngaho.
Mayola wOshilando Sakarias Uunona kolopota ei okwa li a tula ko omukanda tau pula minista womayambulepo eedoolopa nomikunda James Sankwasa a ninge po sha muJuli.
Olopota oyo ya monika koThe Namibian, oya ulika nghee omapangelo taa kendabala okuungaunga noshinima eshi.
Epangelo laNamibia okwa li la katuka ongahatu yokushunifa ounona ava koshilongo shavo muDesemba odula yandja ko ashike ova aluka ko moule weemwedi mbali.
Shimwe shomomafaneko okwa li okupa ounona ava omikanda doukwashiwana, ashike inashi pita.
OLWEENDO
Olweendo lounona ava ohali tameke okudja komukunda wavo, Bata Bata. Ohava di ko neemota ile noubesa. Ashike omafimbo amwe ohava ende ashike kolupandi.
Ohava ende nee fiyo opoSanta Clara odoolopa i li popepi neengaba daNamibia naAngola kombinga yokOshikango.
Keshe efiku ongudu yavo ohai piti eengaba nomikanda dopakafimbo, omukanda oo hau va pitike va dje moshilongo shimwe va yuka mushikwao. Ashike nee, hakeshe umwe e na omikanda.
Vamwe ova ti opu na omikalo dimwe dokutauluka eengaba ino pitila pomuvelo.
“Opu na ondjila imwe oyo hai longifwa kovalandifi ‘vangungula’.
Opu na Ovamuila vamwe navo hava longifa ondjila oyo,” omushingi wohauto ta ti.
Vamwe okwa li vati ve ya moshilongo ve li meeloli, ashike ovashingi vomaloli navo vati ova xulifa po oku va twaalela momudo 2022.
Okudja opo ohava londo eebesha ve uye kOvenduka, ohava pulwa ashike oN$250, osho va ti ngaho.
Omushingi wobesha umwe Nakale okwa ti oku shii kutya osha puka okutwaalela ovanhu vehe na omikanda, ashike okwa hala oimaliwa.
“Otu na oku va fila onghenda ndee hatu va twaalele koN$200 ile N$250.”
Eshi ka popya noThe Namibian, okakadona (10) oka ti oke na eenhele opo haka ka ehela. Pexulilo lefiku, ovakulunhu ohava ka tala ko ounona keenhele oko.
Okakadona aka oka ti oka enda oshinano shile okudja koAngola ke uye kOvenduka. Meme wako oye a hoolola onhele opo haka longele ndee te ka lombwele kutya inaka dja po nandenande.
“Meme oha eta nge oku fiyo osheshi hatu ka kofa. Yee navamwameme vamwe ohava i konhele ya yooloka manga ame nda lombwelwa ndi kale apa,” osho ka ti ngaho. Alushe konguloshi ohaka yandje osho ka ongela.
Domingo (6), okwa ti oha i keumbo noshimaliwa shi fike poN$5 ile oN$20 mefiku.
“Fimbo limwe ohandi pewa oimaliwa ikukutu ndee handi i tula monailona.
Omafimbo amwe ovanhu ohave pe nge omafo, oN$10 ile oN$20 ashike onda lombwelwa kutya nandi pule ashike odola,” osho a ti ngaho.
Ongudu ei oya ti moAngola kamu na ehongo loshali.
Eefikola depangelo moAngola ohadi yadje ehongo loshali, ashike ohali yandjwa ashike kounona vamwe.
Linda Manuele (20), a dja koHumpata, okwa ti moNamibia okwe ya mo muMaalisa.
“Otwe ya okukalelela. Namibia eumbo letu etivali. Ohatu xupu xwepo omu, ohatu dulu okuya kokilinika inatu futa sha, ashike moAngola oto efwa ashike u fye.
Ngee ku na oshimaliwa shokulanda omiti, ito hakulwa.”
Manuele okwe ya koNamibia shaashi okwa mona vakwao hava di ko noimaliwa.
Okwa ti epangelo laNamibia ohali ya mbidida, ta ti nande kave na omalukalwa voo otava mono oixuna pamaxupilo, onghalamwenyo moNamibia oi dulife moAngola.
“Onda hala okutuvikila oumaliwa vange opo ndi tumine keumbo pexulilo lomudo, ile ndi i twale ko ame mwene i ka yambidide ovadali vange ovo tava file ounona vange oshisho ovo nda fiya keumbo,” osho a ti ngaho.
Omuleli wongudu yomilameno moAngola yedina Liberal Party, Luis de Castro, okwa yandja oushima komukalelipo waAngola moNamibia pefimbo letalepo laye mOvenduka.
Okwa ti kutya okwa mwenena ashike oshikumungu shounona tava ehela momapandaanda.
“Otwe ya koKatutura tu tale nghee oshiwana shetu tashi nangala moluheela.
“Ova fiya po oshilongo shavo, oshilongo osho shi na ouyamba, shi na edu liwa needjo dokoshi yedu, ndee ove ya okumona oixuna oku,” osho a ti ngaho.
De Castro okwa ti kapu na nande omunambelewa umwe a dja koAngola a talela po ovanhu ava a talele onghalo yavo.
