Omulumenhu womido dihe shiivike, okwa xulifa konima a pumwa keshina lokolutenda manga kwa li a nangala mondjila yeshina eekilomita di li lwopo15 okudja mOndangwa onguloshi yOlomakaya.
Oshiningwanima osha ningwa lwopotundi 22h30 manga eshina tali di kOndangwa la yuka koTsumeb, omukanda wokoikundaneki wa dja koTransNamib Oshoondaxa tau ti.
Oukwatya wanakufya inau tumbulwa mo mouyelele wa yandjwa.
Kaku shiivike yoo kutya omolwashike omulumenhu ou e na okukala a nangala mondjila yeshina lokolutenda.
Omukulunhuwiliki woTransNamib Desmond van Jaarsveld okwa yandja omahekeleko kovakwapata vanakufya novapopepi naye, ta ti ehangano otali longele kumwe nomalutu oveta omondjila sha landula oshiningwanima.
“Ohatu longele kumwe nawa nomalutu oveta omondjila ndele hatu yandje eyambidido la pumbiwa kovanhu aveshe ovo va li meshina pefimbo loshiningwanima,” Van Jaarsveld ta ti.
Okwa indila oshiwana shi kale kokule nondjila yomashina okolutenda, ta londwele kutya omashina ihaa mbilike diva.
“Omashina aa pumbwa oshinano shile opo a mbilike filufilu,” osho a ti ngaho.
Van Jaarveld okwa weda po kutya TransNamib natango okwe litula mo mokuxwaxwameka eameno lomalutenda okupitila momahongo oshiwana.
Ehangano ola indila oshiwana shi likaleke kokule neendjila domalutenda opo kukelelwe omafyo ahapu oludi eli.
Moshiningwanima shikwao sha yooloka, omulumenhu umwe okwa hangika moixwa a xulifa koSauyemwa koRundu onguloshi yOshoondaxa.
Oshiningwanima vati osha ningwa potundi 18h00.
Omulumenhu ou Kambongi Hausiku, okwa li vati te liyave manga ina xulifa, olopota yopolifi tai ti.
Hausiku vati okwa dja meumbo e ke livatele moixwa i li popepi, te lidenge po ndee ta xulifa. Meme waye vati okwe mu shikula shaashi vati okwa kala ko.
“Eshi e ya popepi nondjila i li popepi, okwa hanga ongudu yovanhu ya ongalela omunhu vati e lidenga po ndele ta xulifa.
“Okwa ya polutu ndele ta mono kutya nakufya omonamati,” omukulunhu womakonakono oimbuluma yopolifi koKavango Ushilo Moses Simaho ta ti.
Simaho okwa ti omido danakufya kadi shiivike natango.
Olutu laye okwa li la twalwa kOkila yOshipangelo shaRundu, oko la teelelwa li konakonwe kutalike osho sha etifa efyo.
Omakonakono opolifi otaa twikile.
