Ovanafaalama ovo hava landifa eengobe kehangano lombelela laNamibia ledina Meat Corporation of Namibia (Meatco) ova futwa eemiliona di li N$31 kehangano eli moule woivike ivali ya pita, nande ongeshefa oya iwa moshipala komukifi wekondo nelaka.
Oimaliwa ei oya yandjwa kovanafaalama ovo va yandjele eengobe koMeatco mOvenduka pokati komafiku 29 Auguste nomafiku 11 Septemba.
Omukulunhuwiliki woMeatco Albertus Aochamub okwa ti ehangano ola yandja oimaliwa yovanhu yovanaafalama aishe nande oshimaliwa kashi po nawa molwomukifi ou.
“Ovanafaalama ova fimana kongeshefa yaMeatco, notwa pandula unene elitulemo lavo nelongelokumwe pokati ketu navo.
“Pefimbo longhalo i djuu ngaashi paife, oshinakuwanifa shetu kashi fi ashike okwaamena ongeshefa ashike okuninga yo keshe osho tashi shiva tu yambidide ovanafaalama vetu,” osho a ti ngaho.
Aochamub okwa ti Meatco ota talulula oimaliwa oyo ha longifa moilonga nomoinima ikwao opo a kwashilipaleke kutya okwa twikila nokufuta ovanafaalama, ovayandji vomayakulo naavo e na eengunga davo.
Okwa ti ehangano natango otali kufa eenghatu li wilike oimaliwa yalo manga la teelela omangabeko aeshe a tulilwa po oimuna a kufwe po noilonga i twikile ngaashi shito.
“Nande onghalo yoilonga natango kaku shiivike kutya otai kala ngahelipi, oshinakuwanifa shetu osha yela: okwaamena oshimaliwa, okulongifa oshimaliwa nawa nokutwikila nokuwanifa po oinakuwanifa yetu ngaashi tashi dulika.
Eshi osha pumbwa omatokolo omondjila mongeshefa manga twa teelela oinima aishe i shune kolutenda,” Aochamub ta ti.
