Oministeli yOunamapya nOunaimuna, Eeshi, Omeva nOmatendululo Omadu oya koleka omukifi wekondo nelaka wa monika moshitopolwahoololo shaZambezi konima eengobe di li o12 da dja moKalala Island da konakonwa ndee tadi monika omukifi ou.
Omunambelewa a kula woinamwenyo Kenneth Shoombe okwa ti omukifi ou owa monika moKalala Island moshikandjohoololo shaKabbe, omo ovanambelewa voinamwenyo va mona eengobe di li o20 tadi ulike omadidiliko omukifi ou.
Mouyelele wa yandjwa koshiwana Oshoondaxa, Shoombe okwa ti ovanambelewa voinamwenyo okudja kombelewa youndjolowele woinamwenyo moKatima Mulilo ova konakona omukifi ou momafiku 05 Oktoba.
Shoombe okwa ti ombelewa yomayakulo oundjolowele woinamwenyo oya konakona eengobe di li o12 moshitopolwahoololo.
Okwa ti adishe di li o12 oda monika omukifi momafiku 07 Oktoba.
Shoombe okwa ti oministeli oya tula po omafaneko okulwifa omukifi ou noku u kelela uha tandavele unene.
“Omakonakono a mana mo aa tameka nale opo kutalike kutya owa ya fiyo openi,” osho a ti ngaho.
Sha landula ekoleko lomukifi ou, oministeli oya kaleka omalinyengo oinamwenyo yomakondo nombelela moshitopolwahoololo shaZambezi.
Shoombe okwa ti omikanda adishe dokushinga nokutembula oimuna oda kalekwa.
Omangabeko aa kwatela mo oinamwenyo ngaashi eengobe, eedi noingulu.
Oministeli oya kaleka omalandifo oimuna noivilo aishe oko oinamwenyo hai kala ya ongala.
Okutoma oinamwenyo yomakondo koutomeno vomoshitopolwa, omalandifo ehe li pambelewa noivilo ikwao nayo oya kalekwa fiyo onghalo ya tya po xwepo.
Ashike, Shoombe okwa ti okutoma otaku dulu okutwikila koutomeno, ashike oinamwenyo oyo tai tomwa oye i ashike ya hangika nale ye likalekelwa, shama ashike taku landulwa omilandu adishe odo di na okulandulwa.
Oministeli oya tula po omainda omeendjila i kelele omalinyengo oinamwenyo nombelela moshitopolwahoololo.
Shoombe okwa ti omatunilo opaulumomumbwe aa tameka nale a vatele okuwilika omukifi.
Ekondo nelaka omukifi wa nyika oshiponga hau kwata eengobe, eedi, oikombo noifitukuti imwe.
Oinamwenyo ohai ningi omapuva noipute komilungu nokomakondo.
