Oministili youndjolowele ya didilika oulingilingi moshikondo shayo shoikwanoipangifo

Oministili youndjolowele nomayakulo opanghalafano oya tameka omakonakono omeni kombinga yoinima vati ya nyika omakengelelo moshikondo shayo shokuwilika nokutukula oikwanoipangifo, ya kwatela mo ovanailonga vayo vamwe.

Eshi okwa li sha shiivifwa momukanda wokoikundaneki wa pitifwa Etitano komukulunhuwiliki woministili, Penda Ithindi.

Ithindi okwa ti oministili oya didilika ouyelele tau popi kutya ovanailonga vonhumba moministili, unene ngaa keefitola domiti dakula, otashi dulika tava ningi oinima ya nyika omakengelelo.

She likolelela komukulunhuwiliki, oinima oyo tai popiwa oya kwatela mo okudanena omauyelele oshitoka nokuyukifa omiti keenhele dihe li paveta moshikondo shopashiwana shokutukula omiti.

Oministili oya londwela kutya oinima yoludi eli oi na oilanduli ya mana mo mokuyandja omayakulo opaundjolowele.

“Okudanena ouyelele woshitoka nokuyukifa oikwanoipangifo ya fimana mokuxupifa eemwenyo keenhele da puka otaku piyaaneke oilonga yoministili yokuyandja omayakulo opaundjolowele nawa,” omukanda osho wa ti ngaho.

Otaku tiwa kutya oinima ei otashi dulika ya nuninwa okweeta omumbwe yoinima nande oi li po ya wana.

“Otaku tiwa vali oinima ei oya ningilwa owina opo i ete omumbwe yoinima, tashi lalakanene okungwangwaneka oshiwana nokulanda oinima paulumomumbwe,” Ithindi ta ti.

Okwa ti oministili oya kufa ko omafeekelo aa ye lipaka mo noya tameka nale omilandu da pumbiwa domeni.

“Meendelelo, ovanailonga ovo tava feekelelwa oshinima eshi ova kufwa po manga poilonga yavo meefitola domiti dakula, fiyo oidjemo yomakonakono ya dja mo,” osho a ti ngaho.

Okwa weda po: “Oministili otai longelekumwe nawa novakwatelipo voveta nomahangano akwao omondjila i kwashilipaleke omakonakono awa opauyelele.” omukanda tau ti.

Oministili oya londwela kutya ovo tava ka monika ondjo otava ka taalela oilanduli ya mana mo.

“Ngee omakonakono a pu ovo va monika ondjo yoinima ei ya nyika omakengelelo, oihokolola yomaliumbato avo noimbuluma otai ka tameka, ndee ovo ve na oshinakuwanifa otava ka tulilwa mo oshipofa paveta,” Ithindi ta ti.

Oministili oya ti natango oye lipaka mo mokulwifa oulingilingi moshikondo shoundjolowele nokukwashilipaleka kutya opu na omiti da wana.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.