Opolifi moshitopolwahoololo shaShana oshivike sha dja ko oya ditika po omukainhu eshi vati a ya meehombo nhatu paveta.
Paulina Shiiyanga (55) okwa li a holoka mOmhangu yaMangestrata mEenhana Omaandaxa, omo a pewa obooloha yoshimaliwa shi fike poN$4 000 keudafano kutya ita di mo momudingonoko wEenhana.
Ashike nande ongaho, okwa shuna konima yekumba shaashi vati ita dulu okufuta oshimaliwa shobooloha.
Oshipofa shaye otashi ka udika momafiku 15 Oktoba.
She likolelela kodjo yopolifi, ohombo yaShiiyanga imwe okwa li ya ningwa mOmhangu yaMangestrata mOndangwa, imwe omOmhangu yaMangestrata mOshakati, omanga onhinhatu ya ningilwa mOmhangu yaMangestrata mEenhana momafiku 27 Mei 2011.
Ota tamanekelwa okuya meehombo paveta omanga dikwao inadi teka.
Komufala wopolifi mOshana komisina Andeas Shilelo Omaandaxa okwa koleka kutya omukainhu ou okwa mangwa po.
“Okwa ya mohombo nomunhu umwe paveta omanga e li mohombo imwe natango paveta,” odjo yopolifi tai ti.
Eedjo oda ti Shiiyanga tete okwa li a hombolwa komulumenhu a dja koUnganda ndele ta xulifa. Okwa ka hombolwa vali komulumenhu a dja koCongo naumwe a dja natango koUnganda.
Eedjo natango oda ti ovalumenhu ava otashi dulika va hombola Shiiyanga va hala oufemba waNamibia.
Omulumenhu umwe vati okwe mu pa oshimaliwa shi fike poN$2 500 konima yohombo yavo ndee ta i omanga umwe vati e mu dalifa ounona vahamano.
Odjo yopolifi oya ti Shiiyanga ine likala nokwa popya kutya okwa hala okutambula ko kutya oku na ondjo.
Oshinima eshi otashi ti okwa ya mohombo imwe manga e li muikwao inai teka paveta.
ELONDWELO
Oshipofa eshi oshe ya konima kwa kala kokulondwelwa kombinga yeehombo domiheka da kwatela mo Ovanamibia novadjaidjai.
Momudo 2015, minista mukulu woikwameni, omatembu, eameno nepopilo Pendukeni Iivula-Ithana okwa li a londwela ovanyasha moshilongo vaha ye meehombo domiheka novadjaidjai.
“Oukadona vetu kave udite ko nawa eehombo. Kashi shii vali ohole, kashi na sha vali nokukala pamwe. Oshi na sha ashike nokushakena koomangestrata, okushaina eembapila nokuhengana konima,” osho a tile ngaho.
