Ngoloneya woshitopolwahoololo shaMaheke Pijoo Nganate okwa ti ombelewa yaye oya tameka okuyandja oilongifo i yambidide eeproyeka deyambukepo loshiwana moshitopolwahoololo shaMaheke ashishe.
Omaandaxa, ombelewa yangoloneya oya yandja eeshako di dulife po40 deeshamende koshiwana shomoNossobville di longifwe okutunga ekuma lomaendo, pamwe noilongifo yokuninga omuvelo woproyeka oyo tuu ei.
Eeshako da wedwa po deeshamende okwa li da yandjwa vali koproyeka yokuninga eedopi yomukainhu koWitvlei.
Nganate okwa ti nokofikola i li kOshivelo okwa li kwa yandjwa oilongifo i yambidide okutunga okapale ketanga loukadona, omangha oproyeka yovanyasha yokuninga oiyemo kOmitara oyo ya shikula ko.
Oinima ikwao, mwa kwatelwa oilongifo yomoikunino, oilongifo yokuninga eedopi nomambako, oya fanekwa i ka yandjwe kOtjinene koGoreses nokoshikandjohoololo shEpukiro.
“Eshi oshi na sha nokunghonopeka ovanhu vetu va dule okutunga omaumbo aalushe eedopi ndee tava xulifa po okukala momaumbo opakafimbo,” Nganate osho a ti ngaho, ta weda po kutya eenghendabala edi odi li pamwe naasho tashi pulwa kupresidente Netumbo Nandi-Ndaitwah shokuxulifa po eebashu nokuxwepopeka onghalo oshilongo ashishe.
