Oministeli yEfikopamwe lOukashikekokanhu nOnghalonawa yOunona oya ti omalishangifo opendjela youkwanaluhepo aa kalekwa shaashi kapu na oimaliwa.
Minista wefikopamwe loukashikekokanhu nonghalonawa younona Emma Kantema edi okwe di popya mopaliamente Etine manga kwa li ta nyamukula omapulo a kundukida oshikumungu eshi.
Kantema okwa ti omashangifo otaa ka tameka ashike ngee pwa monika oshimaliwa.
“Ngee opwa monika oshimaliwa, oministeli otai ka shiivifa omafiku omalishangifo nomilandu okupitila meembelewa doministeli moitopolwahoololo nosho yo meembelewa doikandjohoololo,” osho a ti ngaho.
She likolelela kuKantema, ovo kwa li nale inava kwatelwa mo momalishangifo otava ka pewa omhito yokulishangifa, shama ashike ve na oinima aishe ya pumbiwa nonghalo yomomaumbo avo, omalukalwa noiyemo yomomaumbo avo otai dulu okukolekwa.
Opendjela youkwanaluhepo ohai yandjwa komwedi kovanhu ovo va tofwa mo tava mono oixuna ve na omido okudja po18 fiyo o59.
Opendjela ei okwa li ya totwa po momudo 2022 eshi kwa pingenwa po opolohalama yokuyandja oikulya komwedi noshimaliwa.
Omaumbo oo a hanga okumona opendjela yoludi eli paife ohaa mono oshimaliwa shi fike poN$600 komwedi opo a dule okuliyambidida.
“Oministeli otai ka kwashilipaleka yo kutya eembelewa doitopolwahoololo oda kwatelwa mo momalishangifo taa shikula opo kuxwepopekwe eemhito dokulishangifa, kuyandjwe eyambidido kovaningi vomaindilo nokunghonopekwe ekalelepo loinima,” Kantema ta ti.
Minista okwa yeleka kutya opendjela ei oya nuninwa okuyambidida omaumbo oo e li moluhepo la mana mo meedoolopa nomeenhele odo di li popepi needoolopa ashike kai fi nande yoohandimwe.
Ouyelele woministeli owa holola kutya muSeptemba omaumbo e li o27 132 otaa mono opendjela ei oshilongo ashishe, noshitopolwahoololo shaKhomas osho shi na omwaalu uhapu, shi na omaumbo e li 11 993, taku landula Kavango Ushilo nomaumbo e li o1 995.
Omaumbo aa pumbwa okukala e na oumbangi woiyemo, kakele kopendjela younona opo a dule okulishangifa. Momaumbo omo hamu yandjwa opendjela yovakulupe ile youlema itamu yandjwa oshimaliwa eshi.
Ovaningi vomaindilo ova teelelwa va yandje okamutwe koshilongo kaNamibia, eendjapo domadalo, ouyelele waapo hava di ngaashi omafutilo omayakulo amuni nosho yo omikandapopilo dokuhena oilonga.
Oministeli oya didilika kutya oipumbiwa ei otashi dulika i patele kondje ovanhu ovo hava di momalukanda vehe na eenomola domaumbo voo ihava futu omayakulo amuni.
Kantema okwa ti oinima ei oya pumbiwa opo kukolekwe opo omunhu ha di, onghalo yeumbo nongee okwa hanga ngaa okumona omauwa aa opo yo kukelelwe elongifonai lopolohalama.
