Okabinete oka dimina okutula po omainda opaulumomumbwe kukelelwe etandavelo loudu wekondo nelaka oo wa puma ko moshitopolwahoololo sha||Kharas uhe lihanene oshilongo ashishe.
Eshi osha shiivifwa kupresidente Netumbo Nandi-Ndaitwah pefimbo lomutumba wa fimana kEumbo lEpangelo u na sha noudu wekondo nelaka Omaandaxa.
Omafaneko, oo a diminwa Oshoondaxa, aa kwatela mo okutula po einda la kola moshikandjo shoinamwenyo shaKarasburg, okulonga odalate yeengaba daNamibia naBotswana nokutula po odalate yokukelela oimuna peenhele odo da talika da nyika oshiponga ngee tashi ya koudu ou keengaba daSouth Africa.
Nandi-Ndaitwah okwa ti omilandu edi otadi lalakanene okuwilika omalinyengo oinamwenyo nokwaamena eenhele odo inadi monika oudu ou.
Oshoondaxa, eengudu dokukonakona omikifi doinamwenyo oda konakona oinamwenyo i li 29 313 meefaalama di li o68, noda mona oinamwenyo i li o127 i na oudu ou meefaalama o15.
Eengudu dokukonakona oinamweyo oda tumwa koshitopolwa oko, omanga yo patulwa omainda omeendjila e li omulongo moshitopolwahoololo sha||Kharas ongeenghendabala dokulwifa oudu ou.
Omivalu da xuuninwa otadi holola eyopombada loudu ou la mana mo nghee wa monikile momafiku 23 Septemba sha landula omakonakono okolabolatoli.
Nandi-Ndaitwah okwa ti Okabinete oka shakena Olomakaya ka konakone oudu ou nokutala kutya oshike vali shi na okuningwa po koshi yOveta yOundjolowele wOinamwenyo.
“Okabinete oka pula kulongifwe Oveta yOundjolowele wOinamwenyo meendelelo nenghonopeko lokuwilika oudu ou nosho yo omilandu deameno da nuka po,” osho a ti ngaho.
Okwa ti omahangano a kwatelwa mokulwifa oudu ou aa lombwelwa a longele kumwe nokukatuka meendelelo a lwife oudu ou.
Nandi-Ndaitwah okwa ti omukifi ou owa ngwangwaneka ovo ve likolelela moimuna yavo. “Oshikondo shoimuna nombelela oshimwe shomwaayo i kwete eliko,” osho a ti ngaho.
Okwa weda po kutya oshikondo otashi yambidida omaxupilo okupitila moinima ya yooloka ngaashi, ovanafaalama, ovanailonga vomeefaalama, ovatuti veendongelwa, ovalongi vombelela novalandifi kondje yoshilongo.
“Oshinakuwanifa shetu shomeendelelo osha yela.
Natu kelele omukifi ou, hatu u kelele uha tandavele ndele hatu amene oinamwenyo oyo inai kwatwa, opo oilonga noipindi i dule okutwikila meendelelo nomomukalo uwa ngaashi shito,” osho a ti ngaho.
Presidente okwa tambula ko kutya engabeko lomalinyengo oimuna neyomoshipala loipindi otaa tula ovanafaalama, ovanailonga neengeshefa momukundu woshimaliwa.
“Keefamili dihapu, oshinima eshi osha eta omalimbililo aapo tadi hange oiyemo yado nonghee di na okulixupifa,” osho a ti ngaho.
Presidente okwa indila ovanafaalama novakufimbinga moshikondo eshi va twikile nokuliufa komalombwelo okudja koshikondo shoinamwenyo.
