Oministeli tai lombwele ovashingi veetekisa
Oministeli yOilonga nOyeendifo oya indila ovashingi vomatuwa, unene ngaa ovashingi veetekisa vaha ngwangwane, tai ti ouyelele wa wana kombinga yeenomola dipe doyeendifo otau ka fatululwa nawanawa.
Eshi kwa li ta popi noThe Namibian Omaandaxa, omukulunhuwiliki Jonas Sheelongo okwa ti oministeli natango oya hala okuninga omalunduluko keenomola dipe notai ka yandja ouyelele nghee di na okulongifwa kovashingi veetekisa ovo hava longifa oyeendifo yavo paumwene.
“Otwa hala okuninga omalunduluko keenomola domahauto, mwa kwatelwa mutu nomaluvala.
Oministeli oi na okuninga omapulaapulo ndele tai yandje ouyelele womondjila nghee eenomola domahauto dipe tadi ka longa.
Ovashingi veetekisa inava ngwangwana, ouyelele otau ka yandjwa we lixwa po,” osho a ti ngaho.
Eshi oshe ya konima ovalongifi vomalungula va nyenyeta kutya inava hala eenomola doihauto yavo da shangwa kutya eetekisa keshe efimbo shaashi otashi dulika ve di longife oilonga yopaumwene.
Eenomola domatuwa odi na omaluva a yooloka, tadi lalakanene oilonga ya yooloka, ngaashi eetekisa, epangelo ovanambelewa vepangelo vokondje yoshilongo, odi na yo omaukwatya oo taa dulu okuyambidida kumonike kutya osheendifo oshalyelye.
Otadi ka ya moilonga ngee eenghundafana novakufimbinga da manifwa.
Novashingi vomatuwa ova pewa fiyo odula va kale va lundululila eenomola davo domatuwa kwaadi dipe.
Omunashipundi wokomitiye i na sha noyeendifo yEumbo Etivali lOpashiwana George Garab okwa ti okomitiye inai kundafanwa nayo natango kombinga yeenomola dipe doihauto depangelo odo da da shiivifwa.
Garab okwa ti oshinima eshi natango inashi dja mo nokomitiye inai mona nande ouyelele washa kombinga yomalunduluko oo taa popiwa, mutu shaashi Eumbo Etivali lOpashiwana oli li mokafudo.
“Fiyo opapa inatu ninga sha. Onghee nee oshi li mondjila,” Garab ta ti.
Okwa ti omanyenyeto ovashingi veetekisa, mwa kwatelwa yo nonghee omalunduluko ape taa kumu ovashingi ovo tava ka shinga eendjila dile puDesemba aa pumbwa okuungaungwa nao, ta indile keshe omunhu e na omanyenyeto oludi eli a shangele kokomitiye ile koministeli kwoovene.
Grab okwa ti ota ka yandja ashike ouyelele wopambelewa ngee okomitiye ya kundafanwa nayo kombinga yoshikumungu eshi.
“Opo ashike handi ka yandja omadilaadilo opambelewa,” osho a ti ngaho.
