Omulumenhu (39) okwa tulwa konima yekumba koKeetmanshoop eshi vati a dipaya ohondakadona yaye pefimbo kwa li tava tanguna mOlomakaya.
She likolelela kolopota yoimbuluma yexuliloshivike ya dja komupopiliko wopolifi yoshilongo, omupedu komisina Kauna Shikwambi, Oshoondaxa, oshiningwanima osha ningwa ongula yOlomakaya meumbo molukanda ledina Ileni.
Olopota oya ti omutamanekwa nohondakadona yaye (39), Wilhelmina Waterboer, okwa li tava tanguna fiyo va tameka okulwa.
Waterboer okwa li a monika kutya okwa xulifa eshi oambulansa ye ya opo pa ningilwa oshiningwanima, ashike ina hangika nande e na oshipute kolutu. Omutamanekwa okwa mangwa po nokwa hangika vati nokapakete kepangwe.
Okwa li ta holoka mOmhangu yaMangestrata moKeetmanshoop onghela. Shikwambi okwa ti omakonakono moshipofa eshi otaa twikile.
Natango, kOmulunga moGrootfontein, ovanyeki va homata vati ova ponokela Eyambeko Trading Bar Etitano konguloshi ndee tava faduka po noshimaliwa shi fike poN$16 000 nongodi yopeke konima va denga omwaameni womaliko nokufininika omulandifi a patulule oshikefa shoimaliwa.
Opolifi oya ti ovalumenhu vatatu, umwe womuvo vati okwa li e na ombisitoli, ova waimina omutamanekwa mukwao oo a kala nale e li mondingosho.
Kakwa li nande pu na omunhu a mangwa po.
Ongodi yopeke noundjato vopombuda vatatu ve na oikutu, eenghaku noilongifo taku feekelwa kutya oyokuteifa omaumbo okwa li va hangika opo pa ningilwa oshiningwanima.
Moshiningwanima sha yooloka koNdama moshitopolwahoololo shaKavango Ushilo, omulumenhu (39) okwa li vati a tuwa neembele mombuda kovalumenhu vavali.
Omutamanekwa (19) okwa mangwa po, omanga omutamanekwa omutivali kali a mangwa po natango.
Nakuningwa oshihakanwa okwa tambulwa moshipangelo shaRundu, ashike kali monghalo tai nuwa omeva.
Komukunda Ombugu moshikandjohoololo shaTsandi, okaana (1) oka xulifa eshi vati ka lyatwa kotuwa.
Opolifi oya ti oshiningwanima eshi osha ningwa manga omushingi kwa li ta shingi ta di meumbo.
Opolifi natango oya lopota omweendi kolupadi a pumwa kotuwa popepi nOmuthiya nolutu lomulumenhu ehe shiivike le lituwa popepi noNiels Engineering mOtjiwarongo.
Omakonakono moiningwanima ei aishe otaa twikile.
