Ovakalimo vomOnawa Extension 7 mOshakati ova nukila pomutenya kutya itava fiye po onhele oyo nande ova pewa omafiku va kale ve i fiya po kelelodoolopa.
Samuel Shoongo, omupopiliko wovakalimo ve li 112 ovo ve likufila edu, okwa lombwela oThe Namibian Etitatu kutya itava fiye po onhele oyo fiyo muni e va pa opo tava ka kala. Elelodoolopa ola dama kutya ovanhu ava ove likufila edu lamuni nola anya eindilo lavo lokukaleka etokolo lalo.
Ovakalimo okwa li va yandja omukanda kelelodoolopa momafiku 17 Septemba, tava indile li talulule etokolo loku va taataya po ponhele opo.
Momukanda wa shangwa momafiku 14 Septemba, ovakalimo ova tumbula oluhepo, okuhena oilonga, okuhena omalukalwa, ounona nokukala itava dulu okulanda omaumbo ombilixa ongomatomeno inava pumbwa okukufwa po ponhele opo manga inaku ningwa omalongekido aapo ve na okuya.
Ashike nee, mayola wOshakati Leonard Hango okwa ti elelodoolopa ola ya mo momukanda pefimbo kwa li la ninga oshoongalele ashike natango ola tokola okutwikila netokolo lalo lotete.
Momukanda wa shangwa momafiku 24 Septemba, wa shangelwa omukulunhuwikili wodoolopa yaShakati Timoteus Namwandi, Hango okwa` koleka kutya ouyelele kombinga yomafiku o14 a pewa ovakalimo ava opo va kale va fiya po onhele ou li mondjila.
Elombwelo eli okwa li tali pula ovakalimo va fiye po onhele pambili manga omafiku 28 Septemba inaa koya.
KATU NA APA HATU I
Nande omafiku aa koya, ovakalimo natango inava fiya po onhele.
Ashoongo okwa lombwela oThe Namibian Etitatu kutya kapu na nande omunhu umwe a kufa po obashu yaye.
“Kapu na nande oumwe womufye a kufa po eumbo laye. Katu na apa hatu i ngee elelodoolopa itali tu tembula… onhele ei itatu i fiye po. Itatu teya po omaumbo etu.
Ohatu ka kala peni ngee otwa teya po omaumbo etu? Tashi ya nashi ye ashike (inatu tila sha),” Ashoongo ta ti.
Ovakalimo ova ti ova hala okukundafana nelelodoolopa nongee hasho otava ka tuka onghatu yopaveta.
OVE LIKUFILA
Hango okwa ti edu eli ole likufilwa puhe na ediminino lamuni.
Hango okwa ti okutunga eebashu taku twikile ponhele ei otaku i eenghendabala delelodoolopa moshipala dokutula olukanda pamufika nokuyandja omayakulo amuni.
Mayola okwa ti elelodoolopa itali dulu okuyandja edu kovakalimo shaashi ashike ova tula po nale omaumbo avo inava pewa epitikilo.
“Elelodoolopa itali pitike eyandjo ledu inali landula omilandu dopaveta,” Hango ta ti.
Hango okwa londwela kutya ngee ovakalimo ova dopa okuliufa komalombwelo, elelodoolopa otali i komhangu li ka pule va kufwe po keenghono nokwaalula edu lamuni.
Okwa yandja omayele kovakalimo va landule omilandu odo da totwa dokuninga omaindilo omadu kelelodoolopa laShakati ponhele yokulikufila ashike edu lamuni puhe na ediminino.
Elelodoolopa ola ti ola kundafana novakalimo oikando ihapu manga inali ninga etokolo lokulongifa eenghono. Muni okwa ti, ovanambelewa ova tameka okukundafana novakalimo muJuni.
Eshi okwa li sha shikulwa komikanda, okuyandja eenomolo keebashu muJuli noshoongalele shoshiwana sha ningwa momafiku 12 Septemba.
Mayola okwa ti eepolohalama domatembu delelodoolopa oda kwatela mo okuyandja eenhele doshali, okukufilwa ko kokweeta omeva nokuyandja olusheno oshali komaumbo oo a hanga okupewa olusheno.
Elelodoolopa, nande ongaho, ola ti itali yandje omadu kOnawa Extension 7 inali landula omilandu dalo.
Hango okwa popya yo vali kombinga youpyakadi wefundja eshi sha yuka pefimbo lodula ongetomeno limwe elelodoolopa li na okutwikila netokolo lalo.
