Oovene veetekisa kOshakati ova pewa fiyo omomafiku 31 Maalisa 2027 va kale ve di shangifa noku di tula omadidiliko oo haa longifwa koyeendifo yoshiwana, mayola waShakati Leonard Hango ta ti.
Hango okwa lombwela oshoongalele shelelodoolopa lOshakati shokomwedi Etitatu kutya okomitiye yewiliko lelelodoolopa oya tambulula ko omulandu woyeendifo, oo wa kwatela mo okudidilika eetekisa modoolopa.
Hango okwa ti okushangifa eetekisa noku di didilika okwa pumbiwa kuyambulwe po ekalelepo loinima nokuungaunga nomukundu wokulongifa oyeendifo inai shangifwa moimbuluma.
Mayola okwa ti oyeendifo imwe inai shangifwa ya ningwa eetekisa modoolopa vati otai longifwa moimbuluma.
Okwa ti oovene veetekisa ovo ve na nale omikanda dokuumbata ovanhu otava dulu okutameka okushangifa nokutulifa oyeendifo yavo omadidiliko okutameka mulotete lomwedi ou.
“Ovo vehe na omikanda otava pewa efimbo lefilonghenda leemwedi nhee opo va mone omikanda nomadidiliko.
Eetekisa dimwe odo inadi didilikwa otadi longifwa moumbudi nomokuvatela eengangala di faduke po,” Hango ta ti.
Etokolo lelelodoolopa ola yandja efimbo la wana koovene veetekisa va kale va shangifa nokudidilika eetuwa davo fiyo omomafiku 31 Maalisa 2027.
