Aagandji yomayakulo pomafumviko oya pumbwa omikandapitikilo dhokuyapa uuthemba wokudhana omaimbilo gopambepo piituthi yomaluhodhi nenge uuna taya thindikile oonakusa kegumbo lya hugunina, osho ehangano lyaaimbi naatoti yomaimbilo moshilongo lyedhina Namibian Society of Composer and Author of Music (Nascam) lya popi ngaaka.
Shoka osha landula sho omwiimbi nomudhengi gwokahumba, Peter Ambambi, a gandja elondodho lya yaga kegonga kwaamboka haya dhana omaimbilo ge pwaana epitikilo okuza kuye.
Ambambi, ngoka a tseyika nawa nedhina M’uambo gwAmbambi, okwa popi kutya mboka taya tsikile nokudhana omaimbilo ge pwaana epitikilo lye, ote ke ya katukila onkatu yopaveta.
Omukuluntuwiliki ta kwathele gwaNascam, Ferdinand Gertze okwa popi kutya oveta ya gamena edhano lyoongalo nomaimbilo ohayi thikama uuna oongalo nenge omaimbilo gomuntu taga dhanwa mokati koshigwana pwaana epitikilo.
“Kohi yOveta yaNamibia yomaimbilo, oongele omaimbilo gomuntu taga dhanwa nokutyapulwa mokati koshigwana naashoka oshi li kohi yOveta yagamenenapo uuthemba woongalo kaadhi yakwe, omanga inoo pewa uuthemba kumwene gwomaimbilo nenge okuza kehangano,” osho Gertze a popi ngaaka.
Okwa popi kutya oveta inayi nuninwa owala iituthi yomaluhodhi, ashike oyina sha nonkalo ya nkene omaimbilo gomuntu taga dhanwa.
Gertze okwa ti kutya omagumbo ngoka ge na omaluhodhi oga pumbwa okukala nomukandapitikilo dhoku ya pa uuthemba wokudhana omaimbilo ngoka – oshoka ngaaka otaga dhanwa okupulakenwa mokati koshigwana.
“Ngele egumbo oli na oluhodhi notali dhana omaimbilo okupitila miikwaradio pethimbo lyoshituthi nenge pethimbo taya thindikile omudhimba nena ngaaka otaya ngeshefa, shoka osha faathana nokutyapulitha omaimbilo kaakwashigwana shoka hashi pumbwa omuntu a kale nomukandapitikilo gwe mu pa uuthemba,” osho Gertze a popi ngaaka.
Okwa popi kutya okudhana oongalo nenge omaimbilo momagumbo paumwene shaashi piituthi inashi kwatelwa mo moveta yokukala wuna omikandapitikilo dhuuthemba wokudhana omaimbilo.
Omwiimbi gwoondjimbo dhopambepo, Naftalie Amukwelele, a tseyika nawa D-Naff, okwa popi kutya pampito yimwe ota tsu kumwe naamwenyeki yiituthi yomaluhodhi ya kale nomikandapitikilo dhuuthemba wokudhana omaimbilo, molwashoka oyena oongeshefa dhokuninga oshimaliwa noyeli moonkatu dhimwe nooDJ.
Ashike nando ongaaka, okwa popi kutya aakwanezimo ye li moluhodhi inaya pumbwa naanaa okuthiminikwa ya kale nomikandapitikilo opo ya vule okudhana omaimbilo ngoka tage ya talaleke pethimbo lyoshikogo oshiluudhe.
“Ngele otashi ya kaanegumbo nenge aakwanezimo pethimbo lyuudhigu, naya pitikwe owala ya topolelathane oluhodhi nombili,” osho a popi ngaaka.
D-Naff okwa popi kutya omaimbilo nenge oongalo dhopambepo odha nuniwa okutalaleka aantu koomwenyo pethimbo lyomaudhigu.
Okupitila mehangano lye lyoondjimbo, M’uambo Musical Works CC (MMW CC), Ambambi okwa popi kutya mboka haya gandja omayakulo gopoosa ohaya longitha omaimbilo gawo pwaana epitikilo, naashoka osha talika ko ongeyako lyomaimbilo molwashoka ohaye ga tula ko pethimbo ye li mongeshefa yawo yokwiimonena shomondjato.
Okwa gandja elondodho ku gamwe gomomahangano ngoka ya koneke haga dhana omaimbilo gawo uuna ye li pomafumviko, pwaana epitikilo.
“Ngele omwe shi tsikile nena otatu ke mu fala kompangu opo tumu futithe,” osho elondodho lya shangwa ngaaka.
Ehangano lyo-MMW CC olya popi kutya ohali longo omutenya nuusiku nolya tegelela omaimbilo gawo ga dhanwe pautho lyooveta.
Mo2023, Ambambi okwa li a gandja oondjindikila koradio yomOndangwa yoShipi FM yi hulithepo okudhana omaimbilo ge molwashoka anuwa okwa li taga dhanwa epitilila pamukalo inaa gu uka.
Oveta yegamenenepo lyuuthemba wooyene yomaimbilo olya gandja uuthemba kooyene yomaimbilo ya katukile onkatu yopaveta mboka taya longitha omaimbilo gawo shaali papitilo lyawo.
