Aakalimo yomoGibeon oya gandja omukandanyenyeto kukomanda gwopolisi yoshitopolwa shaHardap, taya indile opo ku ningwe omakonakono gomeendelelo taga tamanekelwa opolisi yoshitaasi shaGibeon ndjoka anuwa tayi dhenge nokumonitha aantu iihuna.
Omukandanyenyeto, ngoka gwa pewa komanda gwoshitopolwa shaHardap, Sydney Philander nogwa gandjwa wo kondjayi yetanga lyopolisi osho wo komukuluntuwiliki gUuministili wIikwameni, Omatembu, Egameno nEpopilo lyoshigwana, mEtitatu.
Omupopiliko gwaakwashigwana mondolopa ndjoka, Circummy Kaoseb, okwa popi kutya omukandanyenyeto ngoka ogwa gandjwa opo oshigwana shi galulilwe omukumo neinekelo lyopolisi yomomudhingoloko gwawo.
“Otwa gandja omukandanyenyeto ngoka molwashoka aakwashigwana oye na eikwato komutima enene kombinga yaapolisi mboka taku hokololwa taya dhenge aantu noonkondo moGibeon.
Aakwashigwana mboka taya yi koshitaashi shopolisi ya ka mone egameno inaya pumbwa okukala taya ningwa nayi shaali paveta,”osho Kaoseb a popi ngaaka.
Omukandapitikilo otagu popi kutya aakwashigwana mboka taya kongo epopilo okuza poshitaashi shopolisi ohaya iyadha taya monithwa iihuna kaapolisi pamukalo kaaguli pauntu.
Okatendo oka-8 kEkotampango lyaNamibia okayela kombinga yuuthemba wuuntu womuntu, omanga Oveta yoPolisi yo1990 osho wo Omaihumbato giilonga mopolisi ayihe otayi utha opo aapolisi ya kalekepo oveta, ya simaneke uuthemba waantu yo ya longele oshigwana nawa.
Aakwashigwana oya popi kombinga yiipotha yiimbuluma mbyoka ihaayi ungaungiwa nayo pauthikepamwe, taya popi kutya iipotha yimwe ohayi tokelithwa nenge nokuli yi kale inaayi gumwa unene tuu ngele nakutululilwamo oshipotha okwa pamba omupolisi nenge omupopepi gwe.
Oya popi kutya kutya iipotha yaapopepi naapolisi ohayi yapukilwa meendelelo nonondjungu.
“Aantu yetu ohaya yi koshitaasi shopolisi ya ka mone epopilo.
Uuna epopilo ndyoka lye endwa pambambo, nena einekelo lyaakwashigwana maapolisi ohali kana.
Shoka ohashi thindile pevi ekalekopo lyelandulathano moshigwana naashoka osho oshinima sha simana mokukalekapo elandulathano moNamibia,”osho Kaoseb a popi ngaaka.
Omukandanyenyeto ngoka ogwi indile opo aapolisi yoposhitaashi shoka ya ningilwe omakonakono gi ithikamena, ya katukilwe onkatu yomaihumbatonayi gomiilonga uuna ya monika ondjo kutya otaya longo shaali pauyuuki nopaveta, osho wo ku shilipalekwe kutya aakwashigwana itaya kala we nokuhepekwa kaapolisi mboka.
Omukandanyenyeto ngoka ogwa taambiwa peha lya komanda gwoshitopolwa, nokwa popi kutya otagu ka taliwa muule.
