Aadhengu yaantu mokatoo otaku hokololwa omasiku ga zi ko ya tameke okulongitha edhina lya minista gwiikwameni, omatembu, egameno nepopilo lyoshigwana Lucia Iipumbu okutumina aantu uutumwalaka uufupi nelakakano lyokukengelela aantu.
Okupitila momukanda ngoka gwa pitithwa kuIipumbu, mEtitano, okwa popi kutya onomola ye yongodhi nenge uuyelele we otashi vulika wu li moshiponga sho ookalyamupombo kwa li ya tameke okutumina aantu uutumwalaka uufupi nonomola ndjoka yi li kohi yedhina lye.
Onomola ndjoka yongodhi yo +27 73 415 7051 yaSouth Afrika, otaku hokololwa tayi thiki koongodhi dhaantu yi li kohi yedhina lya minista.
“Ngame kandina nande onomola yaSouth Afrika notandi indile oshigwana shoka tashi yakula etumwalaka tali zi konomola ndjoka tayi popi kutya oyandje ye shi taleko onguukengeleledhi ishewe inaye yi idhimbike,”osho a popi ngaaka.
Okwa londodha aakwashigwana kaaya yamukule kuutumwalaka mboka tawu limbilike, kaaya gandje uuyelele wawo wopaholamo nenge wopashimaliwa, yo yi ikaleke wo kokule nokutuma oshimaliwa nenge okugandja omakwatho nomayakulo ngoka taya pulwa konomola ndjoka.
Okwa londodha oshigwana kaashi landule uuyelele kehe tawu ya wilike ya ye komalungula okupitila muutumwalaka tawu zi konomola ndjoka.
Iipumbu okwiindile oshigwana shi kale sha lunguma sho shi kwashilipaleke ngele onomola taya kwatathana nayo oye tuu shili omanga inaaya ninga omatokolo gasha.
Okwiindile aantu ya andjaganeke okatoo hoka opo oshigwana kaashi gwile momake omawinayi.
