Kuku Judith Ndabeni(70) gwomondolopa yaKatima Mulilo, ngoka muule woomvula dha konda pomulongo dha piti a kala a landula omapandaanda ta kongo omakende goombiila ngoka ge ekelwahi opo a ka landithe i imonene mo shomondjato, okwa thigwa pomutenya sho ongeshefa ndjika ya yiwa moshipala.
Uuna omwedhi gwe enda nawa, oha vulu okumona mo oshimaliwa shi li pooN$2 300 ngele a landitha iipakete 100.
Ashike okuza muMaalitsa numvo onkalo ya lunduluka sho iiyemo yaamboka haya landitha omakende ya shuna pevi sha landula sho ositola yaMetro Katima Mulilo ya tameke okukala owala tayi landa omakande goombiila dhoCarling Black Lebel okuza koondingosho ndhoka dhi na omikanda dhokulanditha omalovu.
Ndabeni, oshiwike shika okwa lombwele oThe Namibian kutya okwa li a tameke okulanditha omakende goombiila omimvo dha piti molwashoka oshikwiila shoka ha pewa kepangelo ihashi gwanene okupalutha egumbo lye.
“Okuza ngaa sho Metro a hulithapo okulanda kutse, ihandi vulu we okupalutha aanegumbo lyandje omugoyi nopenzela.
Otwa hala Metro a talulule etokolo ndyoka molwashoka oshimaliwa shokupatulula oondingosho dhina omikanda dhokulanditha omalovu otatu shi adha nee peni ngele otatu nyengwa nale okwiiyambidhidha? Uukalata wiikulya okwa li hawu tu kwathele ashike ngashingeyi ohatu vulu okuninga omasiku inaatu lya molwashoka openzela ndjoka handi kwata ohayi pwile owala mofuto yomeya nolusheno,”osho a popi ngaaka.
Omulandithi gulwe gwomakende goombiila, meme Mary Samutuma, okwa lombwele oThe Namibian kutya oya indikwa oku ka landitha omakene poMetro, noya lombwelwa ye ke ga landithe koondingosho ndhoka dhi na omikanda dhokulanditha omalovu.
Okwa popi kutya ongomukulukadhi keena omusamane nokuna aanona oyendji, okwa li owala ha hupile mokulanditha omakende opo a vule okuyambidhidha oluvalo lwe.
“Okwa li handi futile osikola omumwandje ngoka ti ilongele uupangi nokashona hoka handi mono mokunditha omakende. Ashike muule woomwedhi heyali dha piti onda kala tandi nana nondatu pashimaliwa.
Okwa li handi landitha oohi oonkukutu ashike kadhina oshimaliwa okuyelekanitha nelanditho lyomakende.
Otwa pumbwa lela ekwatho okuza kaaleleli moshitopolwa molwashoka melanditho lyomakende omo owala hatu hupile,”osho a popi ngaaka.
Simasiku Mulijani, ngoka oye omunashipundi gwehanganokalelipo lyaanangeshefa aashona lyedhina Native Small Traders Association (Nasta) okwa lombwele onzonkundaneki ndjika kutya uuhupilo waalandithi yomakende owa gumwa noonkondo ketokolo lya ningwa kuMetro.
Okwiindile wo ombuulaye yaCarling Black Label yi ete ombelewa mondolopa yawo okukwathela okulanda po omakande gaalandithi mboka ngashingeyi ya thigwa pomutenya.
“Oshishiwike nawa kutya onkalo yokwaana iilonga oyi li pombanda noonkondo moshitopolwa shetu, naantu ohaya landitha omakende ngoka okwiimonena shomboloto.
Otashi kala nawa ngele oshikumungu shika osha yapukilwa kombuulaye, osho wo kelelo lyoshitopolwa.
Aalandithi yomakende ohaya kwathele wo mokwoopaleka ondolopa pakutoola mo omake ngoka ge li momapandaanda,”osho a popi ngaaka.
Omukuluntu gwoshitayi shaMetro Katima Mulilo, Lukas Ulenga okwa lombwele onzonkundaneki ndjika kutya oya hulithapo okulanda omakende okuza kwaamboka kaayena omikanda dhokulanditha omalovu molwashoka omakende okwa li ga ningi ogendji epitilila moompungulilo dhawo.
Okwa gwedhapo kutya uuna omakende taga landwa po koondingosho okuza kaalandithi yomomapandaanda ohashi kwathele nokupupaleka onkalo molwashoka ohaya pumbwa omakende uuna taya ka teka oombiila dhoongeshefa dhawo.
“Otwa hulithapo okulanda iipakete yomakende goombiila okuza kaalandithi mboka molwashoka okwa li twa ngundumbalelwa komakende, ngoka nokuli kwa li twa nyengwa kutya otatu ga longitha shike.
Onkene otwa tokola opo owala tu kale hatu taamba iipakete kooyene yoondingosho uuna taya landa oombiila kutse,”osho a popi ngaaka.
