Minista guuyuuki niipambele yaaniilonga Wise Immanuel okwa zi mokalungu kombinga yonkalo ineeyi nyanyukilwa yaakulukadhi anuwa oyo ya kuthapo oshinakugwanithwa shokuluka aanona peha shi ningwe koohe yaanona, nokwa pula kutya onkalo nenge omuthigululwakalo tagu longithwa koomeme oye gu adha peni.
Immanuel ndhoka okwe dhi popi pethimbo lyoshituthi shopamuthigululwakalo sha ningilwa poshitayi shaUnam mOgongo, moshitopolwa shaMusati.
“Mongashingeyi otaku popiwa nee uuthikepamwe naayihe yoludhi ndoka.
Onkene oohe yaanona ngashingeyi hayo we taya gandja omadhina.
Ooyina ngashingeyi oyo taya gandja omadhina gaanona,”osho Immanuel a popi ngaaka.
Okwa pula kombinga ya nkene omalunduluko ngangoka haga vulu okuguma ekwatathano pokati komunona nahe, naashoka unene ohashi holoka molwashoka omulumentu oha kala e wete a patelwa pondje nenge keenawe oonkondo momatokolo genasha nokanona kawo.
“Otatu tumu aanona yetu moondjokana ya ka kale taya kondjele okuluka aanona.
Omudhigululwakalo ngono ogwa zi peni?”osho a pula ngaaka.
Immanuel okwa popi kutya olundji oshigwana ohashi kala nokupula kutya mbela omolwashoka aalumentu haya thigi po nenge haya yi kokule noyana, ashike epulo ndyoka ohaye li pula inaaya dhiladhila kutya ngiika osheetithi oshini.
“Shampa twa mono oohe yaanona taya ikala kokule nayo, ohatu tameke okunyenyeta.
Ihatu pula nee kutya ngiika oshike hashi eta uupyakadhi mbuka,”osho a popi ngaaka.
Okwa popi kutya aalumentu yamwe ohaya kala nomaipulo ngele oyo ngaa shili oohe yaanona yawo unene tuu ngele hayo ya luku okanona.
“Omuntu oto a dha ta popi tati, ‘ngele hangame nda luku okanona, ndele okalukwa kuyina ngawo okanona hono okandje ngaa shili?”osho Immanuel a popi ngaaka.
Minista okwa tongonona omalunduluko ngoka onga uukoloni wopamithigululwakalo, nokwa popi kutya otashi eta engwangwano moshigwana, unene tuu moondjokana nomomakwatathano gopaihole.
Omunawino gwiikwamithigululwakalo ngoka ha longo koUnam, Petrus Mbenzi, okwa popi kutya aakiintu pamuthigululwakalo oya dhana onkadhangala meluko lyokanona, nonande olundji eluko lyokanona ohali kala momake gomulumentu nenge momake gezimo lyomulumentu.
I ikwatelela kaashangi ya yooloka yomambo miipambele yomaluko gaanona, Mbenzi okwa popi kutya omukiintu nenge omupangi ngoka a kwathele mepulumutho lyokanona oha vulu okuluka okanona shi ikwatelela konkalo ndjoka ya li po pethimbo lyepulumutho.
“Omathimbo gamwe meme natate ohaye ipe omalufo gokuluka okanona kawo,”osho Mbenzi a popi ngaaka.
Elenga enene lyOmuthigululwakalo gwAamasubia, Raphael Mbala, okwa popi kutya momudhigululwakalo gwawo aakwanezimo ayehe yaavali yokanona ohaya luku okanona, naakulupe oyo unene haya gandja omadhina gaatekulu yawo.
“Yina yokanona haye ha luku. Edhina oteli adha peni? Ngiika ota vulu okweeta po edhina lyoshiKriste, ashike edhina lyopamuthigululwakalo, ita vulu nande,”osho a popi ngaaka.
