Omuleli wongudu yoPopular Democratic Movement (PDM) McHenry Venaani ota pula a yelifilwe kombinga yomafaneko epangelo okutunga eefaabulika moitopolwahoololo aishe moshilongo, ta pula kutya opolohalama ei otai hange oshimaliwa peni, nghee tai tulwa moilonga nonghee tai longifwa okutota eemhito doilonga.
Venaani omapulo aa okwe a pula omuprima ministe Elijah Ngurare mOmutumba wOpashiwana Etivali.
Venaani okwa ti nande omafaneko epangelo okuxwaxwameka engushupaleko loinima, okwaandjakaneka eemhito dokuyambula po eliko nokutota oilonga aa tambulwa ko, ouyelele kombinga yeepoloyeka inau etwa moshiwana natango.
“Epangelo otali dulu okuyandja ouyelele kutya eepoloyeka dilipipo deefaabulika da tofwa mo naa po tadi ka tungwa?” osho a pula.
Okwa pula yo vali kutengenekwe kutya mutu oshinima eshi otashi ka kosha ingapi naingapi tai ka yandjwa kepangelo, koshikondo shopaumwene nokovanangeshefa vakwao.
Venaani okwa li mbililwa unene ngee oshinima eshi otashi ka kwatelwa komesho koshikondo shopaumwene kombinga youmwene weefaabulika, okuyandja oimaliwa nokukwatela komesho omatungo aa, ponhele yokutota omahangano e likolelela mepangelo kombinga yoshimaliwa.
Okwa pula vali epangelo li popye kutya oshinima eshi otashi kwata efimbo li fike peni shi ye moilonga, mwa kwatelwa kutya okutunga otaku tameke naini, eefaabulika otadi tameke okulonga naini nonaini oilonga tai totwa.
Venaani okwa hala okushiiva kutya oilonga i fike peni tai ka totwa kopolohalama ei nonghee epangelo tali ka kwashilipaleka kutya osho la shoneka osha hangwa.
Natango okwa hala okuunda kutya ovanaafaalama, ovanangeshefa, eengeshefa dishona nodopokati moshilongo otadi ka kwatelwa mo ngahelipi mopolohalama ei.
Omapulo ee ya eshi epangelo la holola kutya eyokomesho ola ningwa moshinima eshi, osho tashi lalakanene oinyangadalwa yokulonga oinima kuyambulwe po eliko loshilongo.
Omapulo aVenaani aa tula epangelo kofola li xulife po okukala tali ningi ashike omilandu domaudaneko ndee tali yandje ouyelele wofaafa kombinga yeepoloyeka, oimaliwa, efimbo noilonga oyo ya fanekwa moitopolwahoololo aishe.
