Ovatonateli womaliko vavali mOkahandja vati ova ponokelwa nokuningilwa omahepeko opalutu kumwene wonhele opo kwa li tava longele, osho sha eta opolifi i ninge omakonakono nokupula eameno lovanailonga.
Ovalumenhu ava ova ti okwa li va dengwa manga ve li moilonga konguloshi.
Hendrik Haulamba okwa ti okwa kala ta shiike onhele konguloshi momafiku 25 Juni manga ina ka kala po okamutumba kashona meni letungo ihali longifwa shaashi okwa li ta dengwa koutalala.
“Okwa li kwa talala efiku olo.
Onda kala handi shiike pondje, ndee handi i meni ndi kale po omutumba kashona,” osho a ti ngaho.
Haulamba okwa ti mwene wehangano ledina Human Drilling Contractors CC, Pieter Human, okwe ya metungo ndee te mu ponokele ine mu aneka.
“Ina popya naame ile a pule nge sha. Okwa tameka ashike ta denge nge noshiti ndee ta ti ota longo nge omupetuko,” osho a ti ngaho.
Eshi a denga nge lutatu oshiti osha teka, Haulamba ta ti.
Haulamba natango okwa ti Human okwa li ta kendabala e mu undulile melambo lili popepi.
Ouyelele wopaunamiti okudja koshipangelo shaKahandja, wa shangwa momafiku 26 Juni, owa ulika kutya Haulamba okwa li a ka konga ounamiti efiku la landula shaashi okwa li e na oipulumuna noshipala sha dinda, oululume monhulo, mofingo, mombuda, komapepe, komaoko nomonho.
Okwa ti Human okwa ka pula ashike ngee oha kala ta kofa moilonga konima a tala oufano.
Konima yomafiku ashona, Haulamba okwa mona elombwelo aye koihokolola.
Omikanda odo da monika koThe Namibian oda ulika kutya ehangano olo ha longele loXpert Security Services ole mu tumina elombwelo a ka ye moihokolola momafiku 29 Juni.
Oihokolola okwa ti oya li ko momafiku 05 Juli keembelewa dehangano mOkahandja.
Omukanda owa holola kutya Haulamba ota tamanekelwa oipofa itatu: okukofela moilonga momafiku 05 Juni, okudopa okuwanifa po oilonga yaye noinakunifa mefiku olo tuu olo nokufaula ehe na epopilo momafiku 27 Juni.
Haulamba okwa ti oshikumungu eshi okwe shi lopota kopolifi.
“Opolifi okwa li ye ya kombelewa ndee tai popi nomuhona wange tete manga inandi ufanwa di ye meni,” osho a ti ngaho, ta weda po kutya okwa li a pulwa ngee okwa hala okupula komesho nokutulila mo Human oshipofa.
Omunambelewa wokwaamena omaliko omutivali, Festus Kamanya, okwa ti naye okwa li a dengwa manga kwa li e li moilonga konhele oko tuu oko mOkahandja.
Okwa ti Human okwe mu denga momafiku 08 Juli konguloshi manga kwa li e li moilonga.
“Okwa li lwopotundi 23h00. Okwa li ndi li moilonga nda fikama, shaashi opolifi okwa li tai ya okushiika,” osho a ti ngaho.
Kamanya okwa ti oshinima eshi okwe ke shi lopota komuhona waye.
Okwa ti oshipofa shoshimbuluma sha tulilwa mo Human oshi li metifa.
Mwene wehangano loXpert Security Services Muller Theron okwa koleka kutya ehangano ola uda oiningwanima ei. “Ovanailonga vange, onghee nee ondi shi shii,” osho a ti ngaho.
Okwa koleka kutya ovanailonga aveshe vavali ova kufwa ko konhele oko.
Ashike nande ongaho, okwa ti oihokolola yaHaulamba kai na sha noshiningwanima eshi.
“Omunhu ou kwa li a ifanwa koihokolola ke na sha noshipofa osho.
Okwa li a ifanwa koihokolola shaashi okwa faula puhe na epopilo. Oyo oinima ya yooloka.”
Omunashipundi wOkahandja Concerned Group, Seth Gariseb, okwa pula omahangano ovaameni vomaliko a ninge po sha kombinga yokwaamena ovanailonga.
“Inatu hala ovanhu vetu va kale tava shindwa. Ovaameni vomaliko nava amenwe. Itashi tambulwa ko omunhu ta denge omunailonga ndee omuhona ita ningi po sha,” osho a ti ngaho.
