Ovanyasha moshitopolwahoololo shaHardap ova indilwa va longife eemhito deepolohalama depangelo odo tadi xwaxwameke ounangeshefa, eewino dopaungoba, ounamapya nounaimuna netoto loilonga.
Oshinima eshi okwa li sha pulwa pefimbo leenghundafana koHoachanas, odo kwa li da twikila fiyo okoStampriet Etine, oko ovanyasha kwa li va lombwelwa eemhito odo di li po nokutuwa omukumo va ete po omadilaadilo opangeshefa e li pamufika.
Kamusela woshikandjohoololo shaMariental Rural, Simon Kooper, okwa ti elalakano oku shi ningila ovanyasha shipu va dule okutota eemhito doilonga, nova yambididwe va kale ve na eengeshefa dishona nodopokati ndee tave di shangifa.
Okwa ti ovanyasha okwa li va ulikilwa nghee ve na okuhandeka eefooloma, ve na okushangifa eengeshefa nokukonga eepoloyeka odo tadi dulu okweeta eemhito doilonga.
“Omukalo yo wovanyasha tava toto oilonga yovanyasha vakwao,” osho a ti ngaho.
Kooper okwa ti oshikandjohoololo osha kundafana novanyasha kombinga yeemhito ngaashi Oshikefa shOmayambulepo Ovanyasha shoPashiwana neepolohalama dikwao tadi lalakanene oku va yambidida va dule okumona oiyemo.
Okwa pula yo eembelewa depangelo, omahangano ovanyasha nomahangano oo eheshi epangelo a longele kumwe neembelewa doikandjohoololo mokunghonopeka eepolohalama dovanyasha.
Natango, Siyabonga !Aebeb wokoshikondo shovanyasha mombelewa yangoloneya okwa ti eewino dopaungoba odi li domoinima ya fimana ya pumbwa okutalwa nawa.
Okwa ti oshikondo shovanyasha otashi longo noudiinini shi ete po olabolatoli yeekompiuta opo kuxwepopekwe eewino dovanyasha domaungoba noku va pitika va mone omauwa omayakulo opamalungula neemhito.
“Otu udite ko nawa efimano lokukala nowina wopaungoba mounyuni ou, unene ngaa eshi omalungula taa pingene po keshe shimwe paife,” !Aebeb ta ti.
Okwa weda po kutya oshikondo shovanyasha natango osha tala vali meyambulepo leewino mounamapya nounaimuna, eengeshefa, ounghulungu nomaduto oinima, omanga tashi yandje ouyelele woilonga nokupaafana eemhito domadeulo opaungoba.
!Aebeb okwa ti eepolohalama dounamapya nounaimuna odo tadi pulwa otadi ka yandja eewino kovanyasha dokukuna oikunomwa, oikwambidi nounamapya nounaimuna tau kalelele.
“Oinima ihai ningwa meenghalamwenyo detu kakele ashike ngee tu na elineekelo meenghono detu lokuya komesho.
Onghalo omu u li itai dulu okwiimba u ye komesho; owa pumbwa okuulika eenghono doye dokuninga elunduluko,” osho a ti ngaho.
Ovanyasha vomoHoachanas noStampriet navo ova yandja omadilaadilo avo eengeshefa odo va hala okuninga, novakufimbinga ove va twa omukumo opo va tule omadilaadilo avo moilonga.
-Nampa
