Omalunduluko oo taa pulwa a ningwe mokatendo kokuwilika oikwamayaka aa kwatela mo okufutifa ovo tava ka tauluka oveta oshimaliwa shi fike poN$500 000, eeveta dokuxulifa po elongifo lomakaya da nyaya komunhu nomilandu dokuwilika omakaya opashinanena da kwata moiti.
Omanyono amwe ee na nokuli eedula omulongo modolongo tadi pewa ovalandifi vomakaya.
Eindilo eli lomalunduluko okwa li la yandjwa kuGabriel Joseph, omupedu kulunhuwiliki woundjolowele moshikondo shoshiwana noundjolowele womidingonoko, pefimbo leenghundafana noshiwana kombinga yomalunduluko okatendo kokuwilika oikwamakaya komudo 2010 mOvenduka.
“Onotwaveta otai pula ovo tava ka tauluka oveta va pewe ehandukilo la ya fiyo opoN$500 000 moinima ya yooloka, mwa kwatelwa okuninga omashiivifo opaipindi omakaya, okuxwaxwameka nokukwashilipaleka nelandifo lomakaya kounona,” osho a ti ngaho.
Joseph okwa ti nande omashiivifo opaipindi omakaya aa ngabekwa kokatendo komakaya paife, ehandukilo loku shi ninga inali koya poN$200 000 ile okuya modolongo omido inadi koya pomulongo, ile omahandukilo aeshe oshita.
“Oshikumungu shokuxwaxwameka komalungula nokuninga omashiivifo opaipindi inashi popiwa mo nawa moveta yopaife, onghee nee otaku popilwa omalunduluko,” osho a ti ngaho.
Omalunduluko taa pulwa aa kwatela mo yo omilandu da mana mo tadi kelele ovanhu vaha nanene omakaya keshe pamwe.
“Okunanena omakaya otaku ka ngabekwa meni lomatungo ile meenhele doshiwana, doilonga naapo hapa kala omangafifi ovanhu,” osho a ti ngaho.
Omangabeko aa natango aa kwatela mo pondje yeenhele doshiwana ngaashi eefikola noipangelo, opo omunhu ina pitikwa a nane omakaya meni leemita di li o50 popepi neenhele edi ile neenhele domayakulo ounona.
“Itaku ka nanenwa omakaya meni leemita di li o50 peenhele depangelo ile meenhele doilonga,” Joseph ta ti.
Oveta ei natango otai ka longifwa peenhele dokuteelela, momikweyo nopeenhele opo hapa longekidwa oikulya noikunwa.
Oveta oyo tai pulwa otai ti opo okunana omakaya kwa kelelwa inapa nanenwa omakaya nandenande, kapu na nokuli nande okunanena omakaya meni letungo kwa pitikwa.
Oovene ile ovanhu ovo tava wilike eenhele ovo tava ka dopa okutula oveta ei moilonga otava ka pewa ehandukilo lofuto yoshimaliwa shi fike poN$60 000, ile odolongo yomido da ya fiyo opunhatu, ile omahandukilo aeshe oshita.
