Ovanafaalama ova kelelwa vaha vende oimuna yavo molwomukifi wekondo nelaka.
Omupopiliko wOministeli yOunamapya nOunaimuna, Eeshi, Omeva nOmatendululo Omadu Romeo Muyunda okwa ti ovanambelewa ashike voundjolowele woinamwenyo vepangelo va pitikwa va yandje ovenda yomukifi wekondo nelaka shaashi omukifi ou ohau wilikwa kepangelo.
“Oovene voimuna ova ngabekwa vaha vende oimuna yavo, shaashi omukifi wekondo nelaka ohau wilikwa kepangelo,” Muyunda ta ti.
Muyunda okwa ti etunilo tali dengele okwa li la teelelwa li tameke momafiku 14 Oktoba moshitopolwa shaKarasburg.
Okwa ti ovenda ei otai yandjwa omalweefo atatu moule weemwedi nhatu, ta weda po kutya ovanafaalama otava ka teelelwa va twale oimuna yavo i ka vendwe peenhele nomafimbo oo taa shiivifwa kovanambelewa voundjolowele woinamwenyo.
Oshikonga eshi otashi ka kwatela mo eefaalama odo di li koumbuwanhu wondjila yoB3 pokati koAriamsvlei noGrunau nondjila yoC10 okuyuka kOrange River, mwa kwatelwa yo neefaalama dimwe konooli yeendjila edi.
Muyunda okwa ti omwaalu weefaalama edi da monika omukifi ou moshitopolwahoololo sha||Kharas owa ya fiyo opo18, noinamwenyo i li o131 oya monika omukifi ou.
Muyunda okwa ti ovanambelewa voinamwenyo ova manifa okutalela nokukonakona eefaalama di li o82 odo di li popepi nofaalama oyo ya monika omukifi ou tete.
Olweefo etivali lomatalelo oli li mondjila, tali ka kwatela mo eefalama di li oule weekilomita o50 naayo ya monika oudu ou tete.
Okwa ti omainda omeendjila e li o18 aa tulwa po mo||Kharas, Khomas nOtjozondjupa a kelele omalinyengo oinamwenyo oyo tai dulu okukala i na omukifi ou.
Muyunda okwa ti vali Etanga lEameno laNamibia ola tuma omatanga e na oudila vokufaneka a tale ngee ovanhu otava landula ngaa omilandu keenhele odo da monika omukifi ou Etivali.
Muyunda okwa ti epangelo natango ola faneka okutula po ondalate yokuwilika omikifi doimuna tai di koKlein Manasse popepi noAroab ya yuka koNaute Dam nokoFish River Canyon.
Okwa ti oilonga yodalate ei ota twikile ngee oovene vomadu opo tai piti va shiivifilwa pambelewa.
Okwa londwela kutya okuya odalate ei moshipala ile okupiyaaneka ovanambelewa tava longo oilonga yavo oshi li oshimbuluma.
Natango, Muyunda okwa ti omukifi ou owa lopotwa yo koZambezi momafiku 13 Oktoba.
Okwa londwela kutya oshitopolwa shaZambezi oshi li moupyakadi wa kula molwoifitukuti oyo hai dulu okukala i na omukifi ou ihadi mo nosho yo omukifi poishiindalongo.
“Itashi ti shaashi inaku monika vali oimuna imwe i na omukifi ou ngeno kau po vali,” Muyunda ta ti.
Okwa indila ovanafaalama noshiwana shi twikile nokukonakona omalinyengo oimuna nokulopota oinima aishe inai yela ngaashi okuumbata ombelela.
