Ongudu yovafufi vokomalungula yedina RansomHouse oya ponokela pamalungula Etanga lEameno laNamibia, tai ningi omatilif okupitifa oiholekwa yEtanga lEameno.
Oshimbuluma eshi ovanawino tava ti osha nyika oshiponga neenghono osha ningilwe Olomakaya la dile ko.
Ehangano eli lovafufi vokomalungu ola sholondodeka Etanga lEameno laNamibia ongolimwe lomoihakanwa yalo nokunyanyangida ouyelele tau popi kutya oli na omauyelele oshikondo sheameno.
Ongudu ei natango oya tulika etumwalaka la yukifwa kewiliko lEtanga lEameno laNamibia.
“Kewiliko lEtanga lEameno laNamibia.
Otwa kala twe mu teelela oule wefimbo, ashike mbela ongudu yeni yomauyelele opaungoba oya tokola okuholeka oshiningwanima eshi sha ningwa po mehangano leni.
Okwa li twa teelela mu tu dengela neenghono opo mu kelele ouyelele weni wopaumwene, omikanda deepoloyeka diha andjakanekwe,” etumwalaka longudu tali ti.
Eponokelo eli ole ya pefimbo Namibia natango ta ungaunga neeveta di na sha noimbuluma yopamalungula nokwaamena omauyelele opaumwene.
Konima yeemwedi hamano da pita lwaapo, onotwaveta yoimbuluma yokomalungula okwa li taku tiwa oya manifwa, nokwa li kwaatelelwa i yandjwe kopaliamente muMaalisa.
MuJuli, minista womauyelele nomakwatafano opaungoba Emma Theofelus okwa ti onotwaveta yoimbuluma yokomalungula neameno lomauyelele oya manifwa.
MINISTA A ‘KUMWA’
Minista wetanga leameno noipambele yoonakulwa vakulu Frans Kapofi okwa ti ke na ouyelele wa wana kombinga yeponokelo eli.
Oshivike sha dja ko okwa ti okwa li ashike a lombwelwa kutya oministeli oya shakeneka omikundu okumona omauyelele onhumba.
“Okwa li ashike nda lombwelwa kutya opu na oupyakadi wokumona omauyelele avo amwe, ndee otava ti otava feekele okuponokelwa pamalungula,” osho a ti ngaho.
Minista okwa ti ina pewa ouyelele kombinga yoRansomHouse ile omatilifo ayo oo taa ningilwa etanga leameno.
“Eshi oshikando shotete handi shi udu, onda kumwa nokuli okuuda oshinima shi li ngaho,” osho a ti ngaho.
OUYELELE WEPANGELO U LI MOSHIPONGA
Omunawino woimbuluma yokomalungula Paulinus Sheehama okwa londwela kutya ovafufi voludi eli tava mono omauyelele a fimana epangelo ile eameno lopashiwana otashi dulu okweeta oupyakadi wa kula koshilongo.
“Ngee ito liufa kwaasho tava pula, otava dulu oku nyaneka ouyelele ile ve u landife po komalungula. Ndele osho osha nyika nee oshiponga unene,” osho a ti ngaho.
