Oministeli yOipambele yOmeumbo, Omatembu, Eameno nEpopilo loshiwana oya pula kuningwe omukalo wa nuka po wokulwifa oimbuluma eshi ya patulula pambelewa oshikonga shedina Operation Basadi Etitano.
Eshi kwa li ta popi pepatululo loshikonga mOvenduka, minista Lucia Iipumbu okwa ti oshikonga eshi inashi shoneka ashike okukwata po ovanhu nokuyandja omahandukilo, ashike nashi tale yo kokukelela oimbuluma, okwaamena eemwenyo nomaliko, nokunghonopeka yo elineekelo loshiwana momahangano okukwatela po oveta.
“Epangelo itali dulu ashike okukala tali nyamukula konima oimbuluma ya ningwa nale,” osho a ti ngaho, ta indile omahangano eameno a kale a teelela okuningilwa omatilifo, okukelela oimbuluma nokunyamukula nawa ngee oiningwanima ya ningwa.
Iipumbu okwa dimbulukifa ovanambelewa tava kufa ombinga moshikonga omu kutya eenghono davo nadi longifwe nawa, pamufika woilonga nopamukalo uwa, nefimaneko, oushili, puhe na olwaamambinga nosho yo okufimaneka ounhu-womunhu.
Iipumbu okwa londwela kutya omaliumbato a puka, elongifo nai leenghono nokuliumbatela nai oshiwana otaku dulu okuya moshipala eenghendabala dokutunga po elineekelo pokati koshiwana nekwatelepo loveta.
Okwa pula ovakalimo va longele kumwe nopolifi pakulopota oinima ya fa inai yela nawa nokuyandja ouyelele tau dulu okuvatela okukelela oimbuluma nomaukwatya ovatamanekwa.
Minista okwa ti okulwifa oimbuluma nakuningwe she likolelela kEfinamhango, eeveta domondjila, omilandu doufemba womunhu nomilandu dokukalela po oinima.
Okwa indila ovanyasha vaha longe oimbuluma, ta ti oshikonga nashi kale pamufika tashi di oindjemo iwa tai etwa kelongelokumwe nekalelepo loinima.
