Omuprima minista Elijah Ngurare okwa londwela ovanailonga moshikondo shoikwaveta vaha kale nokulongifa oveta mokuningila ovanhu matilifo, te va pula va longife osho ta ifana “oveta yomondjila”.
Edi Ngurare okwe di popya pefimbo ta yandje etumwalaka ponhele yomupedu presidente Lucia Witbooi poshoongalele shomafiku atatu shi na sha noikwaveta moshilongo sha ningwa mOvenduka Etitatu.
Omuprima minista okwa yandja oushima koveta oyo ta ti ohai kwata ashike ovo va ninga oinima ya nafangwa omanga tai efa oonakuninga oimbulu moshili va ninge eshi va hala.
Oshoongalele osha konakona omikundu odo da taalela oshikondo shouyuki moNamibia nokutala kutya oshike shi na okuningwa po kuxwepopekwe eyandjo louyuki moshilongo.
“Ohandi pula elongelokumwe lakola momahangano, oshimaliwa sha wana, exwepopeko leemhito dokumona ouyuki nokuyambula po elongelokumwe pokati komalutu omapangelo noshitopolwa,” osho a ti ngaho.
Ngurare okwa indila omahangano ouyuki a tule mumwe ouyelele nomakwatafano opaungoba manga yo taa kwatele po omauyelele a fimana, ta ti oungoba nau vatele okuninga oshikondo shouyuki shiwa notashi dulu okuvatela keshe umwe.
Oshoongalele okwa li sha eta pamwe ovakalelipo okudja moshikondo shouyuki shaNamibia va kundafane omalunduluko taa lalakanene okunghonopeka oshikondo shouyuki nokuxwepopeka oilonga nomanyamukulo pefimbo.
