Ovanyasha okwa li va waimina Ouministeli wOundjolowele nOmayakulo Opanghalafano mokulilongekidila Efiku lOundjolowele wOpamadilaadilo mokuwapaleka oshipangelo shomayakulo opamadilaadilo mOvenduka.
Oshinima eshi osha landula olopota yoThe Namibian neudo oyo ya popya kutya ovanhu ve li 11 489 ova li moipangelo molwoupyakadi wopamadilaadilo momudo woshimaliwa 2024/25, novanhu ve li 91 544 ve na oupayakadi woundjolowele wopamadilaadilo okwa li va didilikwa pefimbo olo tuu eli.
Olopota oya popya kutya ovanhu ve li 123 ve na oudu wopamadilaadilo ova xulifa moule wefimbo la tumbulwa nokwa didilikwa kutya oudu ou otau etwa unene koutondwe, okatongotongo, omaupyakadi momapata nomikundu dopanghalafano.
Oshinima eshi okwa li sha kwatelwa komesho komupedu minista woundjolowele Suzan Ndjaleka, oo kwa li a waimina ovanyasha mokuwapaleka oshipangelo, eshi sha yuka pefiku lokomudo lokudimbuluka oudu ou.
“Oilonga ei edimbulukifo kutya oundjolowele wopamadilaadilo oshinakuwanifa shakeshe umwe.
Omudingonoko wa yela, tau tambula ko keshe umwe ou li ondodo yotete yeveluko, ongushu netelameno laavo tava mono ouhaku.
“Eshi kashi fi ashike okuwapaleka.
Okuulikila yo ovanaudu vetu kutya ove wetike, ova fimanekwa nova pumbwa efiloshisho longushu momudingonoko wa amenwa nowafimanekwa,” omupopiliko woministeli Walters Kamaya ta ti.
Efiku lOundjolowele wOpamadilaadilo lOpaunyuni otali ka dimbulukiwa momafiku 10 Oktoba moshitopolwahoololo shaKhomas.
Kamaya okwa indila oshiwana shi twikile nokuungaunga nomautondwe a dingilila oudu wopamadilaadilo nokutota eenhele da manguluka dokuyandja omayambidido kovanhu ovo va pumbwa ouhaku wopamadilaadilo.
“Oministeli oya pandula ovanyasha molweenghendabala douxwepopeka omayakulo opaundjolowele nokushakeneka epangelo ondjilakati okupitila mopolohalama ei,” osho a weda po ngaho.
