Ovanailonga koNamdeb ovo ve li oilyo yehangano lovanailonga vomeemina ledina MineWorkers Union of Namibia (MUN) okwa li va ninga ehololomadilaadilo Etine, tava pula ehangano li tambule ko omunashipundi walo mupe a hoololwa, Laina Festus.
Ehangano ola yandja omukanda komukulunhuwiliki woNamdeb Riaan Burger tau pula Festus a tambulwe ko konima a mona omawi e li 510 momahoololo oshitai a ningwa momafiku 18 fiyo 31 Auguste.
Ta lesha omukanda ponhele yongudu aishe, hamushanga womauyelele wehangano lovanailonga koshitai shaNamdeb Nestor Shimutwikeni okwa ti kutya ehangano inali kondjifa omahoololo ashike otali twikile nokwaanya okutambula ko Festus, oo kwa li a hoololwa a kwatele komesho oshitai.
“Namdeb eshi aanya okutambula ko Festus a kalele po ovanailonga moilonga itashi ti ita dulu yo okuninga munashipundi woshitai, shaashi ei oinima ya yooloka,” osho a ti ngaho.
Ehangano eli lovanailonga vokeemina natango itali popile omapopyo omaliumbatonai oo taa popilwa Festus, tali ti oshikumhungu eshi natango oshi li kOmbelewa yOmunambelewa wOipambele yOilonga.
Ehangano otali pula opo Namdeb a tofe mo omilandu donhumba detwokumwe ile oveta oyo tai kelele Festus a ye mombelewa ndele ta xulifa po okuninga eenamanana edi etokolo laxuuninwa.
Ola hala Namdeb a fimaneke elifikamenepo lehangano noilonga yopaudemokoli yoilyo yalo.
