OMBELEWA yOmuprima Minister ota yi ka ninga oshigongi shomathaneko uule womasiku gaali moshitopolwa Oshana oshiwike shika. Oshigongi shika oshina sha neilongekidho okwiilongekidhila efundja, ngele olye ya nuumvo.
Omunambelewa omukuluntu gwoshitopolwa Oshana, Johannes Kandombo okwa ningi etseyitho ndika momushangwa ngoka a tumine Nampa etitatu oshiwike sha yi. Okwa ti elalakano lyoshigongi shika olyo oku kaleka eilongekidho kombinga yefundja moshitopolwa pomuthika gu li nawa. Oshigongi ota shi ka tulapo woo ekwatathano pokati kewiliko lyiiponga yopaushitwe nomikalo ndhoka hadhi longithwa uuna pena efundja opamwe nomathaneko gokwiilongekidhila efundja moshitopolwa. Oshigongi otashi ka ningilwa pegumbo lyaayenda lya Etuna Guest House pOngwediva etitatu sigo etine oshiwike shika. Oshitopolwa sha Shana osho shimwe shiitopolwa muumbangalantu woshilongo sha kala noku mona iihuna komeya gefundja omimvo ne dha pitipo.
