Kamusela wongudu yoUnited Democratic Front (UDF) melelo loWindhoek Ricardo Garoeb, okwa popila eenghendabala depangelo dokwoongela eengunga damuni, ta ti omalelodoolopa ee li moupyakadi woshimaliwa molwomayakulo itaa futwa.
Garoeb okwa li ta nyamukula kelombwelo laminista womayambulepo eedoolopa noitopolwa yokomikunda James Sankwasa tali pula omalelo eedoolopa a tete ko omeva nolusheno meembelewa depangelo, eengeshefa nomahangano oo taa dopa okufutala omayakulo amuni.
Garoeb okwa lombwela oThe Namibian Etitano kutya oomuni moshilongo ashishe ove li momumbwe yoshimaliwa shaashi ovayakulwa otava dopa okufuta omayakulo avo a fimana ngaashi omeva nolusheno.
“Osha fimana opo ovayakulwa aveshe va wanife po oinakuwanifa yavo va kwashilipaleke eyokomesho leyandjo lomayakulo,” Garoeb ta ti.
Ashike nee, okwa londwela kutya etulomoilonga lelombwelo nali longwe mo nawa taku landulwa omulandu weeveta odo di li po nale nomilandu deenghundafana.
Okwa ti omayakulo a fimana noinyangadalwa yopaliko inaa piyaanekwa inashi pumbiwa, unene ngaa opo omalandulafano okufuta e li nale metifa ile eenamanana tadi ungaungwa nale nado pambelewa.
“Ongewiliko, ohatu yambidida eenghendabala dokuxwepopeka okwoongela oiyemo nokukwata nawa oshimaliwa, ashike ohatu pula yoo kuningwe eenghundafana domondjila pokati komalelodoolopa, epangelo, omahangano neengeshefa opo ku hangwe omaudafano omondjila manga omeva inaa tetwa ko keenghono,” osho a ti ngaho.
Elombwelo laminista ola eta eemhata, novayambididi otava ti oomuni ova pumbwa omilandu da mana mo va ongele eengunga davo deemiliona.
Ovandjadjukununi voo otava ti kutya okuteta ko omayakulo inaku longwa mo nawa otashi dulika ku denge nai eyandjo lomayakulo neengeshefa.
