Aalumentu ye li omugoyi oye liwe mokashoko sho taku hokololwa ya hangene nokukwatonkonga omukiintu gwomimvo 25 sha ningilwa momudhingoloko gwaNau-Aib, mOkahandja, ongula yOsoondaha ya zi ko.
Pauyelele wa pitithwa komupopiliko gwopolisi moshilongo, omupevikomufala Kauna Shikwambi, aalumentu mboka oya kuthilemo nakuninga oshihakanwa ombele noya yi momilalo naye koonkondo.
Shikwambi okwa popi kutya oshiningwanima shoka osha ningilwa popepi nomagumbo gaaniilonga yaNamWater poNau-Aib, omanga omukiintu ngoka a li mela lyondjila a thinda kegumbo.
“Pauyelele wa zi kunakuninga oshihakanwa, kali ta vulu okukuga a mone ekwatho molwashoka aafekelwa oye mu ningile omatilitho kutya otaye mu tsu nombele,”osho Shikwambi a popi ngaaka.
Opolisi oya popi kutya aafekelwa oya fadhukapo mbala konima yoshiningwanima sho ya mono oshihauto tashi ya popepi nehala ndyoka.
Omukiintu ngoka okwa kongo ekwatho pegumbo lyi li popepi nokwa falwa koshipangelo a ka ningilwe omakonakono nokumona uuhaku.
Aafekelwa inaya tulwa natango miipandeko sigo nomakonakono gomiya dha shinana otaga pula komeho.
Pokati mpoka, omulumentu gwomimvo 18 otaku hokololwa a kwatonkonga mumwayinakadhona gwomimvo 10, sha ningilwa momudhingoloko gwolukanda lwaTobias Hainyeko mOutapi, mEtitatu lya zi ko.
Komanda gwopolisi yoshitopolwa shaMusati, komufala Ismael Basson, okwa koleke oshiningwanima shoka nokwa popi kutya osha ningwa ethimbo lyomutenya.
Omufekelwa ina tulwa natango miipandeko, nomakonakono gopolisi otaga pula komeho.
OMAIKUTHOMWENYO
Aalumentu yaali otaku hokololwa yi imangeleke mehuliloshiwike lya zi ko miiningwanima iyali ya yooloka, shimwe osha ningilwa mOvenduka noshikwawo omOnkurenkuru.
Uuyelele mboka owa tseyithwa kuShikwambi, okupitila molopota yiimbuluma mbyoka ya ningwa mehuliloshiwike lya zi ko.
Moshiningwanima shotango, omulumentu gwedhina Petrus Johannes (41) okwa adhika i imangelekela megumbo tali adhika momudhingoloko gwaPionierspark mOvenduka, lwopotundi 13h00 mEtitano.
Nakusa ina dhiga ko ombapila yetompelo lyeikuthomwenyo, ishewe kapuna ngoka ta pelwombedhi oshiningwanima shoka. Aapambele yanakusa oya tseyithilwa nale onkundana yoluhodhi nomakonakono gopolisi otaga pula komeho.
Moshiningwanima sha faathana, olutu lwaHaruwodi Newonga (43) olwa adhika momukunda Gava moshitopolwa shaKavango Uuninginino mOlyomakaya lwopotundi 14h00.
Opolisi oya lopota kutya omudhimba gwa nakusa ogwi itsuwika komusita gwiimuna ngoka kwa li ta litha momudhingoloko ngoka.
Kapuna ombapila yetompelo lyeikuthomwenyo ya thigwapo kunakusa.
Aapambele yanakusa oya tseyithilwa nale onkundana yoluhodhi nomakonakono gopolisi ogeli metifa.
