GUMWE gwomwaamboka ya hulithila moshiponga shoshindhila yedhagadhaga, ndyoka lya gu mo mombanda pooha dhokapale koondhila ketanga lyegameno mOshaanda ngula yEtitano lyeti 11 Apilili 2014,
Evaengeline (Eve) Naufiku Nghimwenavali a zile komukunda Oshindobe mOukwanyama moshitopolwa shaHangwena okwa fumvikwa kengathithi lyaalilasa pOngenga okuziilila mongeleka yaNgenga mOlyomakaya ngaka ga zi ko geti 19 Apilili 2014.
Mokati kaalilasa omwa li aavali ye, aatekuli ye, aamwayina, ooministeli naandhoka dhopevi, aanashilonga pamwe naye, aakwanezimo nosho wo ookuume naamboka yomomukunda gwawo Oshindobe mOukwanyama moshitopolwa shaHangwena moka.
Ominista yegameno tate Nahas Angula okwa li gumwe gwaamboka ya popitha aalilasa nokweeta po wo etumwalaka lyoluhodhi lyomupresidende Hifikepunye Pohamba omanga omupeviminista gwomidhingoloko nomatalelopo tate Pohamba Shifeta e eta po etumwalaka lyoluhodhi nolyomahekeleko lyomukokolipresidende Sam Nujoma.
Oshiponga shedhagadhaga shika osha dhipaga aantu, sigo opo mpaka, ye li puyaheyali lwaampoka, moka mwa kwatelwa aanona yaali mboka ya adhika taya faalelwa kedhagadhaga ndika kOvenduka hoka lya adhika tali ka tala oministeli yegameno omusamane Nahas Angula e ye a gandje oonzapo koonakupita omadhewo gawo metanga lyomombanda lyaNamibia esiku ndyoka. Sho ngaa lya tuka ongula ndjoka yEtitano lya tumbulwa metetekelo, olya gu mo nokuhwama omulilo. Otaku ti olya li tali hingwa nee komuhingi gwalyo omukuluntu Elifas Angala gwokOmukwawanandadi popepi nOnawa mOmbalantu moshitopolwa shaMusati nomupehahingi gwe nee Evaengeline Nghimwenavali gwokOshindobe kOukwanyama moshitopolwa shaHangwena nOngwediva kwali moshitopolwa shaShana. Otaku tiwa kutya Evaengeline opo a hulithila poshiponga mpoka yo naWilika Ndanyengwa Sheya gwoomvula 27 namee Toini Nekulilo Martin (52) omanga okanona kokamati koomvula ndatu kedhina Mcvince Mwiya, hoka ka adhika taka faalelwa kOvenduka esiku ndyoka ka ka hulithila moshipangelo shaShaanda konima ashike yoshiponga shika, hoka ka li ka falwa meendelelo omanga okamati kamwe kedhina Hendrick Amalwa nako ka ka hulithila koshipangelo shaVenduka hoka ka li ka lundululilwa meendelelo okuza moshipangelo shaShaanda. Omuhingi Elifas Angala ye mwene okwa ka hulithila kOvenduka mEtiyali lyoshiwike sha zi ko, ano meti 15 Apilili 2014 hoka a kala ta mono epango konima yoshiponga shika meti 11 Apilili 2014. Otaku tiwa kutya medhagadhaga ndika omwa li aantu omulongo. Pokati mpoka opwa lopotwa ishewe gumwe a hulitha shoka she eta omwaalu gwaayehe ya sila moshiponga shika puyaheyali nokwa hupa ashike yatatu pethimbo ndika, mboka taku tiwa kutya nonando onkalo yawo itayi limbilike ngaa unene, otaye ehama unene. Oyo nee Werner Nashilundo (35), Nabot Kamati (35) naJohanna Hailaula (31).
Aaleli aakuluntu mbaka oya ti Namibia okwa kanitha omapendafule miilonga yokuhinga oondhila dhetanga lyegameno lyaNamibia. A kanitha aagundjuka omapenda ga li ge shi okuza nokuya po, ngele otashi ya kokuhinga oondhila dhiita ndhika. Taya ti itaya ka dhimbiwa nande esiku limwe koshigwana shaNamibia noye na okusimanekelwa oshilonga shawo shika ye shi longo nuupenda nonuufule. Pethimbo ta gandja omapandulo ge, Omunangeshefa a tseyika nawa Benjamin Hauwanga a tseyika wo nawa nedhina tate BH, ngoka oye a tekula nakusa Naufiku, okwa lombwele aalilasa kutya yo ongaavali, aatekuli naakwanezimo, oya kanitha omukwapata gwawo a li ependa nomugandji gwiiholelwa iiwanawa. “Ondu uva wo kutya okwa li ependa miilonga ye mepangelo. Metanga lyegameno ndyoka lyomombanda, notu wete kutya nepangelo olya kanitha ependa, omunandjungu miilonga nomukadhona a li e shi okuya nokuza po. Katu na we shoka tu na okutya. Kalunga okwe tu pele ye te tu kutha ishewe. Ehalo lye nali gwanithwe,” Tate Hauwanga ta ti ngawo nokupandula ayehe mboka ya li ye ya tondokela noku ya kwathela pamikalo dhi ili nodhi ili. Okwa pandula wo gavena yoshitopolwa shaCunene shaAngola ngoka wo a li a holoka pamwe nosheendo she oshinene nokugandja omahekeleko kuyo kombinga yokuthigwapo kwawo kuEvaengeleine nosho wo kepangelo lyaNamibia sho lya kanitha omapenda galyo miilonga yetanga lyomombepo ngeyi.
Omukuluntu gwetanga lyomombepo Tate Martin Pineas okwa tseyitha pethimbo ta gandja oshipopiwa she kutya omapako goonakusa mbaka ogi ihanena oshilongo notaya kambadhala ya ka kale ngaa pomafumviko gayakwawo yalwe ya hulitha moshiponga shika. Oshipopiwa she otatu ke shi nyanyangidha miifo tayi landula. Oshituthifumviko shaEvaengeline shoka sha li sha wilikwa kutate Sem Dumeni nameme Hendrina Haindongo, pangeleki, osha ningwa komusita gwaNgenga tatekulu D. Hamukwaya. Opwa li aapolisi taya saluta nopu umbwa wo oondjembo dhesimaneko kiilyo yetanga lyomombanda ndyoka lya li mpoka mewiliko lyakomanda Martin Pineas.
