Mahangano aChina taa longele moNamibia aa futa oishoshela ya koya peebiliona di li N$6.6, taa lande oipumbiwa yeemiliona di lwopoN$50 moshilongo, nokutota oilonga i li lwopo48 690 yOvanamibia pokati komudo 2020 no2024.
Omunambelewa woipambele yeliko neengeshefa mombelewa youkalelipo shilongo waChina, Wei Jinming edi okwe di popya koshoongalele shoHuawei Namibia ICT shomudo 2026 sha ningilwa mOvenduka Etitatu.
Okwa yandja omivalu okudja molopota yomahangano aChina moNamibia.
Wei okwa ti omahangano aChina aa yandja yoo omaano oshimaliwa shi li lwopeemiliona o-N$200 konghalonawa yoshiwana, taa longifa omiliona oshinghwanyu nhano mokuxwepopeka eameno meenhele doilonga nokulongifa yoo eemiliona di li N$300 meameno lomudingonoko moule womido odo da tumbulwa petameko.
“Onda hala okukufa omhito ei ndi pandule omahangano aa, naHauwei oye oumwe womuo, molwekufombinga lao meyambukepo leliko laNamibia, oshiwana nomaxupilo ovanhu nosho yo keyambukepo lelongelokumwe pokati koilongo ei ivali,” Wei ta ti.
Okwa ti omivalu edi otadi holola nghee omahangano aChina taa kufa ombinga meyambukepo leliko laNamibia eshi oilongo ei ivali tai twikile nokunghonopeka ekwatafano layo.
Wei okwa ti China naNamibia ove na eudafano lokulongela kumwe monakwiiwa, ta ti oilongo oya kwatela po elongelokumwe la kola moungoba wopamalungula, mehongo nomeyambukepo leliko oule womido di dule po36 nghee Namibia a monene emanguluko.
Okwa popya yoo vali kombinga yetulomoilonga laChina lokukufa po oishoshela ngee ta lande oinima koilongo i li 53 yaAfrica, mwa kwatelwa Namibia, ta ti omulandu owa ya moilonga mulotete laMei neudo.
Okwa ti China oye oshilongo shotete shi na eliko li li pombada, sha tota omulandu ou u li mouwa woilongo yaAfrica.
Wei okwa ti omulandu ou otau amene Ovanamibia ovo hava landifa oinima yavo kondje yoshilongo, ta popi kutya oishoshela yombelela yongobe needi hai landwa moNamibia okuya koChina, oyo kwa li i li okudja peepelesenda di li 12 fiyo o-25, oya kufwa po filufilu.
“Okulandi fa oinima ei koChina oku na ouwa uhapu wopaipindi, noipindi pokati koilongo ei ivali oya teelelika i ye pombada meendelelo,” osho a ti ngaho.
