Oilyo yopaliamente ya yooloka oya anya elombwelo lapresidente tali pula ovanapolitika novanambelewa vakula vepangelo va tameke okulongifa oipangelo yepangelo.
Omulandu woundjolowele wopashiwana, wa ya moilonga mulotete laApiilili, otau pula ovanambelewa vakula vepangelo va tameke okulongifa oipangelo yepangelo ponhele yokuya koipangelo yopaumwene.
Presidente Netumbo Nandi-Ndaitwah elombwelo eli okwe li yandja momwedi omo tuu omo opo a nghonopeke oshikondo shoundjolowele shepangelo, osho hashi yakula Ovanamibia ve dulife peepelesenda o85.
Presidente ina talela po oshipangelo okudja nghee a yandjele elombwelo – molwoundjolowele u li nawa, Ombelewa yaye tai ti.
“Oku na oundjolowele nokwa fimaneka onghalonawa yaye neenghono,” omupopiliko waye Jonas Mbambo ta ti.
“Ngee omumbwe yomayakulo opaunamiti oya holoka, ota ka konga omayakulo a pumbiwa.
Ngeno shito, oikumungu ya pamba oundjolowele womunhu oshinima shopaumwene,” osho a ti ngaho.
Omupedu presidente wongudu yoNamibia Economic Freedom Fighters Kalimbo Iipumbu okwa ti elombwelo itali longo ngee oipangelo yepangelo otai twikile nokukala i li momumbwe yoikwanoipangifo, omiti, ovanailonga nomayakulo akwao a fimana.
Omaandaxa okwa ti ongudu otai yambidida okunghonopeka oshikondo shoundjolowele shepangelo ashike itai dulu okuyambidida omulandu tau tula ovaleli vopolitika moipangelo oyo epangelo vati la dopa okutula oipumbiwa aishe.
Iipumbu okwa ti ina longifa oshipangelo koshi yelombwelo eli shaashi kai na oikwanoipangifo yopaunamiti ya pumbiwa.
“Oshipangelo otashi dulu okukala shi na eendokotola novapangi, ashike ngee omashina a fimana itaa longo, ovanaudu itava dulu okumona omayakulo a nuka po,” osho a ti ngaho.
Okwa ti omulandu inau kala ashike oshinima shokupopiwa moshiwana, ta weda po kutya epangelo nali yandje oindjemo yomakonakono etulomoilonga lomulandu ou youle weemwedi hamano.
Okwa hala epangelo la popya omwaalu wovanambelewa ovo va longifa oipangelo yepangelo, omayakulo oo va mona, omikundu odo va shakeneka nomalunduluko oo a ningwa po moipangelo yepangelo okudja petulomoilonga lelombwelo.
Oshilyo shopaliamente shongudu yoSwanu of Namibia, Evilastus Kaaronda okwa ti ina longifa oshipangelo shepangelo okudja muApiilili.
“Inandi mona omumbwe yokulongifa oshipangelo shepangelo ile keshe ngaa oshipangelo.
Onda kala alushe nokuyambidida elalakano lomulandu wokulongifa oipangelo yepangelo, ashike kakwa li ndi wete ngee otai dulu ngaa oku tu yakula atushe,” osho a ti ngaho.
Okwa ti kutya omalimbililo kombinga yongushu nongee oipangelo yepangelo otai dulu ngaa okuyakula ovanhu aveshe ava aa kala po nale manga nelombwelo inali yandjwa.
Kaaronda okwa ti ina uda yo vali oshilyo shopaliamente shimwe tashi longifa oipangelo yepangalo meemwedi edi.
“Otwa pumbwa okulanda omiti, oilongifo yomondjila nokunghonopeka ovanailonga vetu. Eshi itashi pumbwa ashike elombwelo alike lovanambelewa vakula va longife oipangelo ei,” Vaino Hangula ta ti.
Okwa ti elombwelo eli otali wedele ashike omukundu woshikondo shoundjolowele osho shi li nale moupyakadi.
“Onda yambekwa inandi mona nande omumbwe yokulongifa oshipangelo shepangelo, ashike eelopota okudja kookaume nofamili oda popya kutya onghalo oya yuka ashike kowii,” osho a ti ngaho.
Omuprima minista mukulu Nahas Angula okwa ti ovanapaliamente nava pitikwe va hoolole ngee ova hala okulongifa oipangelo yepangelo ile oyopaumwene.
“Ovo va hala okuya koipangelo yepangelo oshi li nawa. Ashike ngee omunhu oku na oudu wa mana mo ndee okwa pumbwa omayakulo andokotola wopaumwene, ito dulu okufininika omunhu oo a ye koshipangelo shepangelo,” osho a ti ngaho.
Angula okwa ti ovanapaliamente ovo tava dulu okuya koipangelo yopaumwene nava pitikwe va twikile noku i longifa.
“Ehoololo, ehoololo, oudemokoli otau ti ehoololo.
Inamu teya oufemba wavakweni wokuninga ehoololo.”
Minista mukulu woimaliwa Calle Schlettwein okwa pula ngee presidente oku na oufemba wokuyandja elombwelo kovanhu ovo ve na oukalata vomayakulo opaunamiti vepangelo va longife oipangelo yepangelo.
“Kandi shii ngee okwa kala eenghono di li ngaho,” osho a ti ngaho.
Ashike nande ongaho, minista woilonga noyeendifo Veikko Nekundi okwa ti okwa longifa oipangelo yepangelo nota twikile noku shi ninga.
“Eeno, onda longifa oipangelo yepangelo netumba nohandi twikile noku shi ninga.
Puhe na oumbada washa, itandi yambidida omulandu, omulandu owange,” osho a ti ngaho.
Hamushanga wEvava lOvanyasha loSwapo Efraim Nekongo okwa ti ota yambidida elombwelo lapresidente, ta weda po kutya ola pumbiwa kukwashilipalekwe kutya ovo ve na oshinakuwanifa shomayakulo opaundjolowele oshiwana ova mona omayakulo e lifa naao Ovanamibia aveshe.
