Epaphras Denga Ndaitwah, okwa indila ovadali va tekule nawa ounona voumati opo va dule oku ka ninga ovalumenhu novadali vawa monakwiiwa.
Okwa li ta popi peenghundafana di na sha nokaana kokamati Etitano koKavango Uninginino.
Ta popi novamati, ovadali novaleli voshiwana, Ndaitwah okwa ti ovamati nava putudwe nawa opo va ninge ovaleli komongula ponhele yokulonga oimbuluma.
“Onda hala mwa putudwa mu ninge oshiwana shiwa. Onda hala mu kule mu na oshinakuwanifa.
Oshinakuwanifa ohashi tameke naave mwene. Onda hala mu kale ovanhu va fimanekwa moshiwana,” osho a ti ngaho.
Okwa londwela kutya ootate noomeme vahapu otava dopifa ounona vavo. “Vamwe vomufye ootate.
Vamwe vomufye apa oomeme, ashike ootate haaveshe tava wanifa po oinakuwanifa yavo.
Oomeme haaveshe tava wanifa po oinakuwanifa yavo, opu na eyooloko,” osho a ti ngaho, okukala nokaana hako ashike taku kuningi omudali ngee iho file oshisho nokuwilika okaana koye.
Ndaitwah okwa ti okwe lipaka unene mounona voumati shaashi okwa mona omaupyakadi avo moshiwana nomeedolongo.
“Ounona voumati ovo unene nda hala okushoneka mwaasho nda hala okuninga.
Ashike itashi ti oukadona inave uya, oshe tu atusheni.”
Minista wEfikopamwe lOukashikekokanhu nOnghalonawa yOunona, Emma Kantema okwa ti ovalumenhu nava kufe ombinga moinima ya pamba oukashikekokanhu nonghalonawa younona.
“Otwa itavela kutya ovalumenhu novamati nava kufe ombinga. Nava popile keshe elunduluko,” osho a ti ngaho.
Ngoloneya woshitopolwahoololo shaKavango Uninginino Verna Sinimbo okwa tambula ko oshinima eshi, ta ti omutumba ou owa nuninwa ovamati moshitopolwahoololo.
“Kounona voumati ava ve li apa nena, omutumba ou owe mu nuninwa. Pwilikineni nawa ndee tamu patulula omadilaadilo eni.
Oshinima sha kundafanwa nena otashi dulika shi lundulule onakwiiwa yoye,” osho a ti ngaho.
Sinimbo okwa indila ovadali, ovahongifikola novaleli voshiwana va twikile nokuyambidida ounona voumati nokonima yomutumba ou.
“Oshinakuwanifa shetu inashi xulila mopolohalama ei.
Ounona voumati ava va ongala apa nena otava twikile nokupumbwa etwomukumo letu, ewiliko neyambidido liwa eshi tava shuna komaumbo, keefikola nomoshiwana,” osho a ti ngaho.-Nampa
