Ongudu yoUnited Democratic Front (UDF) oya popila e hoololo layo lokuyambidida euliko laGerson Sindano a ninge omunashipundi wokomisi yomahoololo nande eengudu dikwao domilameno odi li ominge neuliko eli neenghono.
Oshinima eshi osha landula omawi Omutumba wOpashiwana a topauka omo eengudu domilameno da yooloka nda dja mo momutumba pefimbo lomahoololo okupopila Sindano a ninge omunashipundi wOkomisi yOmahoololo yaNamibia, omanga oUDF ya shaala mo ndee tai popile euliko laye.
Sindano okwa mona omawi o49 noku li a teelela a ulikwe kupresidente Netumbo Nandi-Ndaitwah paife.
Omupedu presidente wongudu yoUDF Nico Somaeb okwa ti etokolo longudu kakwa li li na sha nopolitika ile okulandifa po omilandu dayo, ashike oli na sha nekufombinga longudu mokutunga po oshiwana.
Omalundilo aa ee ya konima Somaeb a ulikwa a kale mOkomisi yEameno pamwe noshilyo shoSwapo Paula Kooper.
Somaeb okwa ti eengudu dopolitika odi na oinima nomalalakano inaku kala kwe lineekelwa ongudu yaye i landule eengudu dikwao dopolitika shaashi ashike adishe eengudu domilameno.
“UDF ongudu tai lele pamwe noSwapo. Oipundi kai na sha, ashike eshi sha fimana ekufombinga longudu mokuyambula po oshiwana,” osho a ti ngaho.
Somaeb okwa ti owino waSindano wokulongela okomisi ou li shimwe shomomatomeno ongudu tai yambidida euliko laye.
Okwa ti okomisi yomahoololo ehangano la fimana olo itali dulu okulonga nawa lihe na omunashipundi, ta weda po kutya opaliamente oya kateka nale euliko eli oule weemwedi nhatu.
She likolelela kongudu, itai yambidida oshinima osho tai ti osha puka shokukateka oilonga yehangano la fimana.
“Sindano paife ngaha oshilyo shokomisi yomahoololo ndele oku na owino.
Osho a popilwa kupresidente a kolekwe kopaliamente,” Somaeb ta ti.
Ashike nee, ongudu yoIndependent Patriots for Change (IPC) otai pula ngee ediminino eli oli li ngaa pafinamhango nopomilandu dopaliamente.
Oshilyo shoIPC Ferdinard Hengombe osha ti omawi ahapu ovanapaliamente taa popile oshinima eshi itaa ti omulandu owopafinamhango, ou li paveta ile itau dulu okutalululwa.
“Omawi ahapu ovanapaliamente itaa ti omulandu ou li pafinamhango, ou li paveta ile itau dulu okutalululwa,” osho a ti ngaho.
Hengombe natango okwa pula ngee eyambidido loUDF ola kalela po omulandu wetokolo lopaliamente, unene ngaa eshi ongudu kwa li i na omuulikwahoololwa wayo vene, Paula Kooper, okwa ulikwa ndee taku diminwa a pewe omhito imwe.
Omuleli wongudu yoAffirmative Repositioning Job Amupanda naye okwa kelela oshinima eshi, ta ti epangelo kali na vali eenghono dokupatana oinima mOmutumba wOpashiwana inali lotokela kokuhoolola.
Amupanda okwa ti ongudu yaye otai twala oshinima eshi komhangu, ta ti kutya ediminino kali li pafinamhango.
“Ohatu i komhangu. Osho naana kwa li twa hala va ninga.
Okwa li twa anyenwa ouyelele ndele oohaende vetu otave shi longo mo,” osho a ti ngaho.
Natango, presidente woSwanu of Namibia Evilistus Kaaronda okwa ti oudemokoli ihau ningi alushe oinima oyo tai dulu okutambulwa ko kukeshe umwe.
“Oudemokoli ohau longo pamikalo da yooloka.
Keshe ongudu yopolitika ya kalelwa po mopaliamente oi na oikumungu yayo nomakwatafano. UDF naye okwa fa ashike dikwao,” osho a ti ngaho.
