Omahangano epangelo aa pulwa a xulife po okukala ashike a tala mokupewa oimaliwa kepangelo ashike naa wanenwe koimaliwa oyo a pewa nale.
Minista woimaliwa Ericah Shafudah edi okwe di popya pefimbo lokamulongo napresidente Netumbo Nandi-Ndaitwah novakulunhuwiliki vomahangano epangelo mOvenduka.
Shafudah okwa ti omahangano epangelo naa kale a fimaneka okuhanga ondjodi yOmafaneko Omayambulepo Opashiwana keshe efiku.
“Oimaliwa inai wana. Kandi shi kutya ohatu xulifa po oshinima eshi naini. Kapu na efiku natu ka kale noimaliwa ya wana. Kaku na oshitya shi li ngaho,” osho a ti ngaho.
Shafudah okwa indila omahangano epangelo a longife nawa oimaliwa oyo a pewa, ta ti efimbo ola fika lokukonakona kutya epangelo ola yandja oimaliwa i fike peni komahangano aa koolimwe.
“Otashi dulika efimbo lokukonakona kutya omahangano aa pewa oimaliwa i fike peni la fika,” osho a ti ngaho, ta weda po ta ti omahangano amwe ohaa pewa oimaliwa ya koya pobiliona.
Minista okwa ti omukalondjiikilile wokutya kapu na oimaliwa ya wana nau xule ndee omahangano epangelo taa tameke okukwata nawa oimaliwa yoshiwana.
“Oshimaliwa opo shi li, shaashi ngeno kasha li po, ngeno inamu pula ovakwati veetendela ve mu pe eepelesenda 10,” osho a ti ngaho.
Omukulunhuwiliki wehangano lomatuliloshikepa ledina Namibia Ports Authority Andrew Kanime, pefimbo leenghundafana, okwa indila omahangano epangelo aha kale ashike a tala mokupewa oimaliwa kepangelo ndee taa kongo omakwatafano moshikondo shopaumwene opo a dule okumona oimaliwa ya wana.
