Omunhu ehe shiivike ta ti omunambelewa wopolifi vati a kengelela minista mukulu woipambele yomeumbo Pendukeni Iivula-Ithana oshimaliwa shi fike poN$200 000.
Omutamanekwa vati okwa ti omukulunhu wopolifi koKongola moshitopolwahoololo shaZambezi.
Iivula-Ithana okwa kala omunapaliamente oule womido 30 nokwa kala nokukwatela komesho eeministeli da yooloka.
Hamushangandjai mukulu woSwapo okwa anya okutya ko sha koshinima eshi.
Omukulunhu woshikondo shomakonakono oimbuluma moKhomas omupedu komisina Frederick Ndjadila okwa koleka oshiningwanima eshi koThe Namibian Etitano.
Okwa ti osha ningwa momafiku 08 Juli.
“Okwa li sha lopotwa koKlein Windhoek. Oshipofa shekengelelo.
Otaku tiwa vati osha ningwa manga kwa li e li keumbo. Shaashi osha kwatela mo oimaliwa ihapu, itatu popi shihapu.
Ohatu koleke oshiningwanima.
“Otashi konakonwa ndee paushili ohatu pandula oshikondo shoimbuluma yopangeshefa, osho she lineekelelwa oipofa yoimaliwa i dulife poN$100 000,” osho a ti ngaho.
Iivula-Ithana omunapolitika woSwapo omutitano ta kanifa oimaliwa momakengelelo.
Momudo 2024, oThe Namibian okwa li ya lopota kutya minista womaudano Agnes Tjongarero okwa kengelelwa oshimaliwa shi fike poN$711 200.
Vakwao ovo navo va kengelelwa ongaashi Saara Kuugongelwa-Amadhila naminista wetanga leameno noipambele yoonakulwa vakulu Frans Kapofi.
Omupopiliko wopolifi wopashiwana omupedu komisina Kauna Shikwambi okwa li a londwela oshiwana shi kale sha tonata, ta ti oonakuningwa oihakanwa ohava tumine ovafufi oimaliwa vehe shi shii, ile molwoumba nengwangwano.
“Ngee wa dengelwa ongodi komunhu uhe mu shi ta pula kombinga yoimaliwa yoye nouyelele woye wombaanga, ino pwilikina oinima i li ngaho, nande ova ti owa findana ino va pwilikina, shaashi opo hashi tamekele opo,” osho a ti ngaho.
“Shama we va pwilikine ndee tava mono kutya owe lipaka mo, otave ku heke. Onghee nee, ino yandja omauyelele oye komunhu ile u tumine oimaliwa kovanhu uhe va shii,” osho a ti ngaho.
Petameko lomudo oThe Namibian okwa li ya lopota kutya eembanga daNamibia kadi na omilandu dokushunifa oimaliwa oyo ya kengelelwa ovayakulwa.
